ಈ ಲೇಖನದಲ್ಲಿ ಒನಕೆ ಓಬವ್ವ ಮತ್ತು ಆಕೆಯ ಸಾಧನೆಗಳ ಕುರಿತು (onake obavva information in kannada) ನಾವು ಬೆಳಕು ಚೆಲ್ಲಲಿದ್ದೇವೆ. ಒನಕೆ ಓಬವ್ವನ ಕುರಿತು ಹೆಚ್ಚು ತಿಳಿದುಕೊಳ್ಳಲು ನೀವು ಆಸಕ್ತಿ ಹೊಂದಿದವರಾಗಿದ್ದಲ್ಲಿ ಈ ಲೇಖನ ನಿಮಗೆ ಅತ್ಯಮೂಲ್ಯವಾಗಲಿದೆ.
ನಾವು ಭಾರತದಲ್ಲಿ ಆಳ್ವಿಕೆ ನಡೆಸಿದ ಅನೇಕ ಸಾಮ್ರಾಜ್ಯಗಳ ಬಗ್ಗೆ ಮೆಲುಕು ಹಾಕಿದಾಗ ಸಾಮಾನ್ಯವಾಗಿ ಯೋಧರು ಮತ್ತು ಯುದ್ಧಗಳತ್ತ ನಮ್ಮ ಗಮನ ಹೋಗುತ್ತದೆ. ರಾಣಿ ಲಕ್ಷ್ಮೀಬಾಯಿ, ಕಿತ್ತೂರು ರಾಣಿ ಚೆನ್ನಮ್ಮ, ಸಂಗೊಳ್ಳಿ ರಾಯಣ್ಣ, ಟಿಪ್ಪು ಸುಲ್ತಾನ್ ಮತ್ತು ಇತರ ಐತಿಹಾಸಿಕ ವ್ಯಕ್ತಿಗಳು ನಮ್ಮ ಇತಿಹಾಸ ಪುಸ್ತಕಗಳು ಮತ್ತು ನೆನಪುಗಳಲ್ಲಿ ಅಳಿಸಲಾಗದ ಛಾಪು ಮೂಡಿಸಿದ್ದಾರೆ. ನಮ್ಮ ರಾಜ್ಯದ ಇತಿಹಾಸದಲ್ಲಿನ ಇನ್ನೊಂದು ವೀರ ಮಹಿಳೆ ಎಂದರೆ ಒನಕೆ ಓಬವ್ವ ಮತ್ತು ಆಕೆ ಪ್ರದರ್ಶಿಸಿದ್ದ ಶೌರ್ಯ ಮತ್ತು ಧೈರ್ಯ.
ಇಂದಿಗೂ ಒನಕೆ ಓಬವ್ವ ಕನ್ನಡ ಜನತೆಯ ಹೆಮ್ಮೆಯ ಪ್ರತೀಕವಾಗಿ ಪೂಜಿಸಲ್ಪಡುತ್ತಾಳೆ ಮತ್ತು ಕರ್ನಾಟಕದ ವೀರ ಯೋಧರ ನಡುವೆ ನಿಲ್ಲುತ್ತಾಳೆ. ಈ ಗೌರವಾನ್ವಿತ ಗುಂಪಿನಲ್ಲಿರುವ ಇತರರಲ್ಲಿ ಪೋರ್ಚುಗೀಸರ ವಿರುದ್ಧ ವೀರಾವೇಶದಿಂದ ಹೋರಾಡಿದ್ದ ಅಬ್ಬಕ್ಕ ರಾಣಿ ಮತ್ತು ಬ್ರಿಟಿಷ್ ಈಸ್ಟ್ ಇಂಡಿಯಾ ಕಂಪನಿಯ ವಿರುದ್ಧ ದಂಗೆಗೆ ಹೆಸರಾದ ಕಿತ್ತೂರಿನ ರಾಣಿ ಚೆನ್ನಮ್ಮ ಮತ್ತು ಔರಂಗಜೇಬನ ಪಡೆಗಳನ್ನು ವಿರೋಧಿಸಿದ ಕೆಳದಿಯ ಪ್ರಸಿದ್ಧ ರಾಣಿ ಕೆಳದಿ ಚೆನ್ನಮ್ಮ ಕೂಡ ಸೇರುತ್ತಾರೆ.
ನಮ್ಮ ಇತಿಹಾಸದ ಪುಟದ ವೀರ ಯೋಧೇಯರ ಸಾಲಿನಲ್ಲಿ ನಿಂತ ಧೀರ ಮಹಿಳೆ ಒನಕೆ ಓಬವ್ವಳು ತನ್ನ ಕೋಟೆಯನ್ನು ಆಕ್ರಮಿಸಲು ಪ್ರಯತ್ನಿಸುತ್ತಿದ್ದ ನೂರಕ್ಕೂ ಹೆಚ್ಚು ಸೈನಿಕರನ್ನು ಏಕಾಂಗಿಯಾಗಿ ಸೋಲಿಸಿದಳು. ಮೂಲತಃ ಓಬವ್ವ ಎಂದು ಕರೆಯಲ್ಪಡುತ್ತಿದ್ದ ಈಕೆಯ ಪರಾಕ್ರಮದಿಂದ ಒನಕೆ ಓಬವ್ವ ಎಂಬ ಹೆಸರು ಬಂದಿತು.
ಈ ಲೇಖನದಲ್ಲಿ ಒನಕೆ ಓಬವ್ವನ ಕುರಿತು ಲಭ್ಯವಿರುವ ಸಂಪೂರ್ಣ ಮಾಹಿತಿಯನ್ನು (information about onake obavva in kannada language) ನಾವು ನಿಮಗೆ ನೀಡಲಿದ್ದೇವೆ.
Table of Contents
Onake Obavva Information in Kannada | ಒನಕೆ ಓಬವ್ವ ಜೀವನ ಚರಿತ್ರೆ
ಎತ್ತರದ ಬೆಟ್ಟಗಳು ಮತ್ತು ಬಂಡೆಗಳಿಂದ ಸುತ್ತುವರೆದಿದೆ ಜಿಲ್ಲೆಯಾದ ಚಿತ್ರದುರ್ಗವು ಸುಂದರವಾದ ಕೋಟೆಯನ್ನು ಹೊಂದಿದೆ. ಇದು ಒಮ್ಮೆ 1550 ರಿಂದ 1700 ರವರೆಗೆ ಸುಮಾರು 250 ವರ್ಷಗಳ ಕಾಲ ನಾಯಕ ರಾಜವಂಶದ ಆಳ್ವಿಕೆಯಲ್ಲಿತ್ತು. 1700 ರ ದಶಕದ ಉತ್ತರಾರ್ಧದಲ್ಲಿ ಎರಡು ಪ್ರಬಲ ಸಾಮ್ರಾಜ್ಯಗಳ ನಡುವೆ ಆಸೆ ಹುಟ್ಟಿಕೊಂಡಿತು. ಹೈದರ್ ಅಲಿ ನೇತೃತ್ವದ ಮೈಸೂರು ಸಾಮ್ರಾಜ್ಯವು ಚಿತ್ರದುರ್ಗದ ಕೋಟೆಯನ್ನು ವಶಪಡಿಸಿಕೊಳ್ಳಲು ಮತ್ತು ನಾಯಕ ರಾಜವಂಶದ ದೊರೆ ಮದಕರಿ ನಾಯಕನನ್ನು ಜಯಿಸಲು ಪ್ರಯತ್ನಿಸಿತು.
ಆ ಕಾಲದಲ್ಲಿ ಅಸಾಧಾರಣ ಮಿಲಿಟರಿ ಪಡೆ ಹೊಂದಿದ್ದ ಹೈದರ್ ಅಲಿಯು ತನ್ನ ಸೈನ್ಯದೊಂದಿಗೆ ಇತರೆ ರಾಜ್ಯಗಳ ಮೇಲೆ ದಾಳಿ ಮಾಡುತ್ತಿದ್ದ. ನಾಲ್ಕನೇ ಮದಕರಿ ನಾಯಕನು ಹೈದರ್ ಅಲಿಯೊಂದಿಗೆ ಉತ್ತಮ ಸಂಬಂಧವನ್ನು ಹೊಂದಿದ್ದರಿಂದ ಚಿತ್ರದುರ್ಗವು ಆರಂಭದಲ್ಲಿ ಅವನ ಆಕ್ರಮಣದಿಂದ ತಪ್ಪಿಸಿಕೊಂಡಿತ್ತು.
ಆದಾಗ್ಯೂ, ಅದರ ನಾಯಕ ತನ್ನ ನಿಷ್ಠೆಯನ್ನು ಬದಲಾಯಿಸಿದಾಗ ಚಿತ್ರದುರ್ಗದಲ್ಲಿ ಅವ್ಯವಸ್ಥೆ ಉಂಟಾಯಿತು. ಆದ್ದರಿಂದ ಹೈದರ್ ಅಲಿಯು ಚಿತ್ರದುರ್ಗದ ಕೋಟೆ (ಏಳುಸುತ್ತಿನ ಕೋಟೆ ಎಂದು ಕರೆಯುತ್ತಾರೆ)ಯ ಮೇಲೆ ದಾಳಿ ಮಾಡಿ ವಶಪಡೆಸಿಕೊಳ್ಳಲು ನಿರ್ಧರಿಸಿದನು.
ಹೈದರ್ ಅಲಿಯು ಕೋಟೆಯನ್ನು ವಶಪಡಿಸಿಕೊಳ್ಳಲು ಹಲವಾರು ಪ್ರಯತ್ನಗಳನ್ನು ಮಾಡಿದನು. ಅನೇಕ ದಾಳಿಗಳು, ಲಂಚ, ಮತ್ತು ಗೌಪ್ಯ ಮಾಹಿತಿಯನ್ನು ಸಂಗ್ರಹಿಸಲು ಗೂಢಚಾರರನ್ನು ಬಳಸುವುದು ಮುಂತಾದ ತಂತ್ರಗಳನ್ನು ಬಳಸಿದನು.
ಒಮ್ಮೆ ಹೈದರ್ ಅಲಿಯ ಗೂಢಚಾರರು ಚಿತ್ರದುರ್ಗ ಕೋಟೆಯನ್ನು ಕಿಂಡಿಯ ಮೂಲಕ ಪ್ರವೇಶಿಸುತ್ತಿರುವುದನ್ನು ಕಂಡುಹಿಡಿದನು. ಇದನ್ನು ತಿಳಿದ ನಂತರ ಹೈದರ್ ಅಲಿ ತನ್ನ ಸೈನಿಕರಿಗೆ ಬೆಟ್ಟದ ಅದೇ ಕಿಂಡಿಯನ್ನು ಬಳಸಿ ಕೋಟೆಯನ್ನು ಪ್ರವೇಶಿಸುವಂತೆ ಆದೇಶಿಸಿದನು.
ಒಬ್ಬ ವ್ಯಕ್ತಿಯು ನುಸುಳಿ ಹೋಗುವಷ್ಟು ಅಗಲವಾಗಿದ್ದ ಈ ಕಿಂಡಿಯನ್ನು ಕಾಯುವ ಕಾವಲುಗಾರನು ಊಟಕ್ಕೆ ಮನೆಗೆ ಹೋಗಿರುವ ಸಮಯದಲ್ಲಿ ಕೋಟೆಯ ಮೇಲೆ ದಾಳಿ ಮಾಡಲು ಸರಿಯಾದ ಸಮಯ ಎಂದು ಹೈದರ್ ಅಲಿ ಕಂಡುಹಿಡಿದನು.
ಈ ಅವಕಾಶವನ್ನು ಬಳಸಿಕೊಂಡ ಅವರು ಕೋಟೆಯ ಮೇಲೆ ಮತ್ತೊಂದು ದಾಳಿಗೆ ಯೋಜನೆ ರೂಪಿಸಿದರು. ಈ ತಂತ್ರವು ಸೈನಿಕರನ್ನು ಒಬ್ಬೊಬ್ಬರಾಗಿ ರಂಧ್ರದ ಮೂಲಕ ಕಳುಹಿಸುವುದನ್ನು ಒಳಗೊಂಡಿತ್ತು. ಒಬ್ಬೊಬ್ಬರಾಗೆ ತೆರಳಿ ಸೈನಿಕರೆಲ್ಲರೂ ಹೆಚ್ಚಿನ ಸಂಖ್ಯೆಯಲ್ಲಿ ಒಟ್ಟುಗೂಡಿದರೆ ಕೋಟೆಯ ಮೇಲೆ ಆಕ್ರಮಣವನ್ನು ಪ್ರಾರಂಭಿಸಬಹುದೆಂದು ಹೈದರ್ ಅಲಿಯು ಉಪಾಯ ಮಾಡಿದ್ದನು.
ಒನಕೆ ಓಬವ್ವನ ಕಥೆ
ಒನಕೆ ಓಬವ್ವ, ಕರ್ನಾಟಕದ ಚಿತ್ರದುರ್ಗ ಸಾಮ್ರಾಜ್ಯದ ಧೈರ್ಯಶಾಲಿ ಮಹಿಳೆ. ನವೆಂಬರ್ 11 ರಂದು ಛಲವಾದಿ ಹೊಲಯ ಸಮುದಾಯದಲ್ಲಿ ಜನಿಸಿದ ಒನಕೆ ಓಬವ್ವ ಕಹಳೆ ಮುದ್ದ ಹನುಮ ಎಂಬಾತನನ್ನು ಮದುವೆಯಾಗಿದ್ದಳು. ಒನಕೆ ಓಬವ್ವನ ಪತಿಯಾಗಿದ್ದ ಕಹಳೆ ಮುದ್ದ ಹನುಮನನ್ನು ಚಿತ್ರದುರ್ಗ ಕೋಟೆಯ ಭದ್ರತಾ ಸಿಬ್ಬಂದಿಯಾಗಿ ನೇಮಿಸಲಾಗಿತ್ತು.
ಒಂದು ದಿನ ತನ್ನ ಗಂಡನು ಮನೆಯಲ್ಲಿ ಊಟ ಮಾಡುತಿದ್ದಾಗ ಅವನಿಗೆ ಬಾಯಾರಿಕೆಯಾಯಿತು ಅವನಿಗಾಗಿ ಓಬವ್ವ ಗುಡ್ಡದ ಹಳ್ಳದ ಬಳಿಯ ಬಾವಿಯಿಂದ ಮಡಕೆಯಲ್ಲಿ ನೀರು ತರಲು ಹೋಗಿದ್ದಳು.
ಅಲ್ಲಿ ಹೈದರ್ ಅಲಿಯ ಸೈನಿಕರು ಕೋಟೆಯೊಳಗೆ ನುಸುಳಲು ಪ್ರಯತ್ನಿಸುತ್ತಿರುವ ಶಬ್ದಗಳನ್ನು ಅವಳು ಕೇಳಿದಳು. ಬೇಗನೆ ಮನೆಗೆ ಹಿಂದಿರುಗಿದ ಅವಳು ತನ್ನ ಪತಿಗೆ ವಿಷಯವನ್ನು ತಿಳಿಸಲು ಪ್ರಯತ್ನಿಸಿದಳು. ಆದರೆ ಅವನು ತನ್ನ ಊಟ ಮಾಡುತ್ತಿರುವುದನ್ನು ಗಮನಿಸಿದ ಆಕೆ ಊಟದಿಂದ ಎಬ್ಬಿಸುವುದು ಸರಿಯಲ್ಲವೆಂದು ಯೋಚಿಸಿ ಆಕ್ರಮಣಕಾರರನ್ನು ತಾನಾಗಿಯೇ ಎದುರಿಸುವ ಧೈರ್ಯದ ನಿರ್ಧಾರವನ್ನು ಮಾಡಿದಳು.
ಆರಂಭದಲ್ಲಿ ಭಯಭೀತಳಾದ ಆಕೆ ಧೈರ್ಯ ತಂದುಕೊಂಡು ಒಂದು ಒನಕೆಯನ್ನು ತೆಗೆದುಕೊಂಡು ಅವಳು ಅದನ್ನು ಹಿಡಿದು ಕಿಂಡಿಯ ಬಳಿ ನಿಂತಳು.
ಮೊದಲ ಕಿಂಡಿಯಿಂದ ತೆವಳುತ್ತಿದ್ದ ಸೈನಿಕನ ತಲೆಗೆ ಒನಕೆಯಿಂದ ಹೊಡೆದಳು. ಶಬ್ಧ ಮಾಡದೆ ಅವಳು ಅವನ ದೇಹವನ್ನು ಬಂಡೆಯ ಹಿಂದೆ ಎಳೆದುಕೊಂಡು ಹೋಗಿ ಮತ್ತೆ ಒಬ್ಬೊಬ್ಬರಾಗಿ ಕಿಂಡಿಯಿಂದ ಹೊರಬರುತ್ತಿದ್ದ ಸೈನಿಕರ ತಲೆಯ ಮೇಲೆ ಒನಕೆಯಿಂದ ಹೊಡೆದು ಬಂಡೆಯ ಹಿಂದೆ ನಿರ್ಜೀವ ಸೈನಿಕರ ರಾಶಿಯನ್ನು ಹಾಕಿದಳು.
ಅಂತೆಯೇ ಅವಳು ಸಣ್ಣ ಕಿಂಡಿಯ ಮೂಲಕ ಕೋಟೆಗೆ ಪ್ರವೇಶಿಸುವ ಎಲ್ಲಾ ಸೈನಿಕರನ್ನು ಹೊಡೆದುರುಳಿಸುವ ಕಾರ್ಯವನ್ನು ಮುಂದುವರೆಸಿದಳು. ಶತ್ರುಗಳು ಗುಟ್ಟಾಗಿ ಕಾರ್ಯನಿರ್ವಹಿಸುತ್ತಿದ್ದರಿಂದ ಅವರಲ್ಲಿ ಯಾರೊಬ್ಬರೂ ಸಾಲಿನಲ್ಲಿ ಮುಂದಿನ ವ್ಯಕ್ತಿಗೆ ಯಾವುದೇ ಧ್ವನಿ ಅಥವಾ ಸಂಕೇತವನ್ನು ನೀಡಲು ಸಾಧ್ಯವಾಗಲಿಲ್ಲ.
ಆದ್ದರಿಂದ ಕಿಂಡಿಯಲ್ಲಿ ಸಮೀಪಿಸುತ್ತಿರುವ ಯಾವುದೇ ಹೈದರ್ ಅಲಿ ಸೈನಿಕರಿಗೂ ಅಪಾಯದ ಬಗ್ಗೆ ತಿಳಿದಿರಲಿಲ್ಲ. ಧೈರ್ಯಶಾಲಿ ಮಹಿಳೆ ಅಂದು ಕೋಟೆಯನ್ನು ಭೇದಿಸಲು ಪ್ರಯತ್ನಿಸುತ್ತಿದ್ದ ಎಲ್ಲಾ ಶತ್ರುಗಳನ್ನು ನಿರ್ಭಯವಾಗಿ ಒನಕೆಯಿಂದ ತಲೆಯ ಮೇಲೆ ಹೊಡೆದು ಕೊಂದಳು.
ನೀರು ತರಲು ಹೋದ ಓಬವ್ವ ತುಂಬಾ ಸಮಯ ಕಳೆದರೂ ಬಾರದಿದ್ದದ್ದನ್ನು ಗಮನಿಸಿದ ಅವಳ ಪತಿ ಕಹಳೆ ಮುದ್ದ ಹನುಮನು ಕೊಳದ ಬಳಿಗೆ ಹೋದನು ಮತ್ತು ಅವಳು ಧೈರ್ಯದಿಂದ ಹೋರಾಡಿ ಹಲವಾರು ಆಕ್ರಮಣಕಾರರನ್ನು ಕೊಂದು ಹಾಕಿದ್ದ ಹೆಣದ ರಾಶಿಯನ್ನು ನೋಡಿದನು. ಇದನ್ನು ನೋಡಿದ ಅವನು ಬೆಟ್ಟದ ಮೇಲೆ ಬೇಗನೆ ಧಾವಿಸಿ ಶತ್ರುಗಳ ಬಗ್ಗೆ ರಾಜನನ್ನು ಎಚ್ಚರಿಸಲು ಕಹಳೆ ಊದಿದನು.
ಮದಕರಿ ನಾಯಕನ ಸೈನಿಕರು ಹೈದರ್ ಅಲಿಯ ಸೈನ್ಯದ ಸೈನಿಕರನ್ನು ಕೊಂದರು. ಆದಾಗ್ಯೂ, ಸೈನ್ಯವನ್ನು ಶತ್ರುಗಳ ಕಡೆಗೆ ನಿರ್ದೇಶಿಸುವ ಮಧ್ಯದಲ್ಲಿ, ಕೋಟೆಯನ್ನು ಪ್ರವೇಶಿಸಿದ ಕೊನೆಯ ಆಕ್ರಮಣಕಾರನನ್ನು ಒಬ್ಬವ್ವ ಗಮನಿಸಲಿಲ್ಲ. ದುರಂತವೆಂದರೆ ಆ ಒಬ್ಬ ಆಕ್ರಮಣಕಾರನು ಒಬವ್ವಳನ್ನು ಕೊಂದನು.
ಆದರೂ ಅಂದಿನ ಓಬವ್ವನ ಸಮಯಪ್ರಜ್ಞೆಯಿಂದಾಗಿ ಅಂದು ಚಿತ್ರದುರ್ಗ ಕೋಟೆಯು ಉಳಿಯಿತು. ಆದಾಗ್ಯೂ, ಹೈದರ್ ಅಲಿ ಅಂತಿಮವಾಗಿ 1779 ರಲ್ಲಿ ಕೋಟೆಯನ್ನು ವಶಪಡಿಸಿಕೊಳ್ಳುವಲ್ಲಿ ಯಶಸ್ವಿಯಾದನು ಎಂಬುದು ಗಮನಿಸಬೇಕಾದ ಸಂಗತಿ.
ಶತ್ರುಗಳ ವಿರುದ್ಧ ಏಕಾಂಗಿಯಾಗಿ ಹೋರಾಡಿದ ಓಬವ್ವನ ವೀರಾವೇಶ ಇಂದಿಗೂ ಅಚ್ಚಳಿಯದೆ ಉಳಿದಿದೆ. ಆಕೆ ವೀರಾವೇಶದಿಂದ ಕಾವಲು ಕಾಯುತ್ತಿದ್ದ ಕಿಂಡಿಗೆ ಈಗ ಓಬವ್ವನ ಕಿಂಡಿ ಎಂದು ಹೆಸರಿಡಲಾಗಿದೆ.
ಒನಕೆ ಓಬವ್ವ ಜಯಂತಿ
2021 ರಿಂದ ಕರ್ನಾಟಕ ಸರ್ಕಾರವು ಒನಕೆ ಓಬವ್ವ ಜಯಂತಿಯನ್ನು ಆಕೆಯ ಜನ್ಮ ದಿನವಾದ ನವೆಂಬರ್ 11 ರಂದು ಆಚರಿಸಲು ಪ್ರಾರಂಭಿಸಿತು. ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ಇತ್ತೀಚೆಗೆ ಓಬವ್ವನ ಶ್ಲಾಘನೀಯ ಕಾರ್ಯಗಳನ್ನು ಗುರುತಿಸಿ, ಒನಕೆ ಓಬವ್ವನನ್ನು ಮಹಿಳಾ ಶಕ್ತಿಯ ಪ್ರತೀಕ ಎಂದು ಹೊಗಳಿದರು.
ತರಬೇತಿಯ ಕೊರತೆಯ ಹೊರತಾಗಿಯೂ ಒನಕೆ ಓಬವ್ವನು ಅನೇಕ ನುಸುಳುಕೋರರನ್ನು ಕೊಂದ ಅಸಾಧಾರಣ ಮಹಿಳೆ.
ನಮ್ಮ ಈ ಲೇಖನವು ಒನಕೆ ಓಬವ್ವನ ಕುರಿತ ಎಲ್ಲಾ ಮಾಹಿತಿಯನ್ನು (onake obavva information in kannada) ನಿಮಗೆ ನೀಡಿದೆ ಎಂಬುದು ನಮ್ಮ ಭಾವನೆ. ಇನ್ನೂ ಯಾವುದಾದರೂ ವಿಷಯವನ್ನು ನಾವು ಇಲ್ಲಿ ಸೇರಿಸಲು ತಪ್ಪಿದ್ದಲ್ಲಿ ಅವುಗಳನ್ನು ಕಾಮೆಂಟ್ ಮಾಡಿ.
Frequently Asked Questions (FAQs)
ಚಿತ್ರದುರ್ಗ ಕೋಟೆಗೆ ಏನೆಂದು ಕರೆಯುತ್ತಾರೆ?
ಚಿತ್ರದುರ್ಗ ಕೋಟೆಗೆ ಏಳುಸುತ್ತಿನ ಕೋಟೆ ಎಂದು ಕರೆಯುತ್ತಾರೆ.
ಚಿತ್ರದುರ್ಗದ ರಾಜ ಯಾರು?
ಚಿತ್ರದುರ್ಗದ ರಾಜ ಮದಕರಿ ನಾಯಕ.
ಚಿತ್ರದುರ್ಗದ ಮೊದಲ ನಾಯಕ ಯಾರು?
ಮತ್ತಿ ತಿಮ್ಮನ ನಾಯಕ ಚಿತ್ರದುರ್ಗದ ಮೊದಲ ನಾಯಕ.
ಚಿತ್ರದುರ್ಗ ಕೋಟೆಯನ್ನು ನಿರ್ಮಿಸಿದವರು ಯಾರು?
ಚಿತ್ರದುರ್ಗ ಕೋಟೆಯನ್ನು ಚಾಲುಕ್ಯರು ಮತ್ತು ಹೊಯ್ಸಳರು ಮತ್ತು ವಿಜಯನಗರ ಸಾಮ್ರಾಜ್ಯದ ಚಿತ್ರದುರ್ಗದ ನಾಯಕರು ನಿರ್ಮಿಸಿದರು.
ಚಿತ್ರದುರ್ಗ ಕೋಟೆಯ ಮೇಲೆ ದಾಳಿ ಮಾಡಿದವರು ಯಾರು?
ಚಿತ್ರದುರ್ಗ ಕೋಟೆಯ ಮೇಲೆ ದಾಳಿ ಮಾಡಿದವರು ಹೈದರ್ ಅಲಿಯ ಸೇನೆ.
ಒನಕೆ ಓಬವ್ವನ ಆಯುಧವೇನು?
ಹೆಸರೇ ಸೂಚಿಸುವಂತೆ ಒನಕೆ ಓಬವ್ವನ ಆಯುಧ ಒನಕೆ.
ಒನಕೆ ಓಬವ್ವನ ಗಂಡನ ಹೆಸರೇನು?
ಒನಕೆ ಓಬವ್ವನ ಗಂಡನ ಹೆಸರು ಕಹಳೆ ಮುದ್ದ ಹನುಮ.
ಒನಕೆ ಓಬವ್ವ ಜಯಂತಿ ಎಂದು ಯಾವಾಗ ಆಚರಿಸಲಾಗುತ್ತದೆ?
ಪ್ರತಿ ವರ್ಷ ನವೆಂಬರ್ 11 ರಂದು ಒನಕೆ ಓಬವ್ವ ಜಯಂತಿ ಆಚರಿಸಲಾಗುತ್ತದೆ.
ಈ ಬ್ಲಾಗ್‌ನಲ್ಲಿರುವ ಎಲ್ಲಾ ವಿಷಯವು ಹಕ್ಕುಸ್ವಾಮ್ಯವನ್ನು ಹೊಂದಿದೆ ಮತ್ತು ಲೇಖಕರ ಅನುಮತಿಯಿಲ್ಲದೆ ನಕಲು ಮಾಡುವುದನ್ನು ಅನುಮತಿಸಲಾಗುವುದಿಲ್ಲ.
All content on this blog is copyrighted and copying is not allowed without permission from the author.
