Valmiki nayaka history in kannada, Nayaka Caste History in Kannada, bedara nayaka samaja history in kannada, chitradurga madakari nayaka history in kannada, maharshi valmiki story in kannada, bedara kannappa story in kannada, halagali bedara dange history in kannada, surapura raja venkatappa nayaka history in kannada, nayaka caste subcastes in kannada, valmiki jayanti significance in kannada, nayaka palegaras of karnataka history in kannada
ಕರ್ನಾಟಕದ ಅತಿ ಪುರಾತನ, ಶೂರ ಮತ್ತು ವೀರ ಪರಂಪರೆಯುಳ್ಳ ಒಂದು ಅದ್ಭುತ ಸಮುದಾಯವೆಂದರೆ ವಾಲ್ಮೀಕಿ ನಾಯಕ ಜನಾಂಗ. ಕಾಡಿನಿಂದ ಬಂದು ನಾಡನ್ನೇ ಆಳಿದ ಶೂರರ ಜನಾಂಗವಿದು. ಮಹಾಭಾರತದ ಕಾಲದಿಂದ ಹಿಡಿದು ಬ್ರಿಟಿಷರ ವಿರುದ್ಧದ ಸ್ವಾತಂತ್ರ್ಯ ಹೋರಾಟದವರೆಗೂ ಇವರ ಇತಿಹಾಸ ಅತ್ಯಂತ ರೋಮಾಂಚನಕಾರಿಯಾಗಿದೆ. ದಕ್ಷಿಣ ಭಾರತದ ಇತಿಹಾಸವನ್ನು ತೆಗೆದು ನೋಡಿದರೆ ಈ ಸಮುದಾಯದ ವೀರಗಾಥೆಗಳು ಪುಟಪುಟಗಳಲ್ಲೂ ರಾರಾಜಿಸುತ್ತವೆ.
ಈ ವಾಲ್ಮೀಕಿ ನಾಯಕ ಜನಾಂಗದ ಸಂಪೂರ್ಣ ಇತಿಹಾಸ, ಅವರ ಪುರಾಣದ ಉಗಮ, ಹಿಂದಿನ ವೃತ್ತಿ ಮತ್ತು ಈ ಸಮುದಾಯದ ಪ್ರಸಿದ್ಧ ವೀರರ ಕುರಿತಾದ ಸಂಪೂರ್ಣ ವಿವರ ಇಲ್ಲಿದೆ.
Table of Contents
ವಾಲ್ಮೀಕಿ ಮತ್ತು ಪುರಾಣದ ಹಿನ್ನೆಲೆ
ನಾಯಕ ಜನಾಂಗದ ಇತಿಹಾಸ ಬರಿಯ ಇತಿಹಾಸವಲ್ಲ, ಅದೊಂದು ತ್ಯಾಗ ಮತ್ತು ಬಲಿದಾನಗಳ ವೀರಗಾಥೆ. ಪುರಾಣಗಳ ಪ್ರಕಾರ, ಈ ಜನಾಂಗದ ಮೂಲವು ಬಹಳ ಪ್ರಾಚೀನವಾದದ್ದು. ಹಿಂದೂ ಮಹಾಕಾವ್ಯ ರಾಮಾಯಣವನ್ನು ರಚಿಸಿದ ಮಹರ್ಷಿ ವಾಲ್ಮೀಕಿಯವರು ಜನಿಸಿದ್ದು ಇದೇ ನಾಯಕ ಸಮುದಾಯದಲ್ಲಿ ಎಂಬುದು ಈ ಜನಾಂಗದ ಅತಿ ದೊಡ್ಡ ಹೆಗ್ಗಳಿಕೆ ಮತ್ತು ಹೆಮ್ಮೆಯ ವಿಷಯವಾಗಿದೆ.
ಪಾರಂಪರಿಕ ಕಥೆಯ ಪ್ರಕಾರ ವಾಲ್ಮೀಕಿ ಮಹರ್ಷಿಗಳ ಮೂಲ ಹೆಸರು ರತ್ನಾಕರ ಎಂದಾಗಿತ್ತು. ಅರಣ್ಯವಾಸಿಯಾಗಿದ್ದ ಇವರು ತನ್ನ ಹೆಂಡತಿ-ಮಕ್ಕಳ ಹೊಟ್ಟೆ ತುಂಬಿಸಲು ಕಾಡಿನ ದಾರಿಯಲ್ಲಿ ಹೋಗುವ ದಾರಿಹೋಕರನ್ನು ಬೆದರಿಸಿ ದೋಚುವ ದರೋಡೆಕೋರನಾಗಿದ್ದನು. ಆತನ ಹೆಸರು ಕೇಳಿದರೆ ಕಾಡಿನ ದಾರಿಯಲ್ಲಿ ಸಾಗುವ ಜನ ನಡುಗುತ್ತಿದ್ದರು.
ಹೀಗಿರುವಾಗ ಒಂದು ದಿನ ನಾರದ ಮುನಿಗಳು ಆ ಕಾಡಿನಲ್ಲಿ ಬಂದಾಗ ರತ್ನಾಕರ ಅವರನ್ನು ಅಡ್ಡಗಟ್ಟಿದನು. ಆಗ ನಾರದರು ವಿಚಲಿತರಾಗದೆ, “ನೀನು ನಿನ್ನ ಕುಟುಂಬಕ್ಕಾಗಿ ಈ ಘೋರ ಪಾಪದ ಕೆಲಸ ಮಾಡುತ್ತಿದ್ದೀಯಲ್ಲ, ನಿನ್ನ ಈ ಪಾಪದ ಕರ್ಮದಲ್ಲಿ ನಿನ್ನ ಹೆಂಡತಿ-ಮಕ್ಕಳು ಪಾಲುದಾರರಾಗುತ್ತಾರೆಯೇ? ಎಂದು ಅವರನ್ನು ಕೇಳಿಕೊಂಡು ಬಾ” ಎಂದರು.
ರತ್ನಾಕರ ಮನೆಗೆ ಹೋಗಿ ಹೆಂಡತಿ-ಮಕ್ಕಳನ್ನು ಕೇಳಿದಾಗ, “ನಿನ್ನ ಪಾಪಕ್ಕೆ ನೀನೇ ಹೊಣೆ, ನಾವು ಪಾಲುದಾರರಲ್ಲ” ಎಂದು ಅವರು ಹೇಳಿದರು. ಈ ಮಾತಿನಿಂದ ರತ್ನಾಕರನ ಕಣ್ಣು ತೆರೆಯಿತು. ಇಡೀ ಕುಟುಂಬಕ್ಕಾಗಿ ತಾನೊಬ್ಬನೇ ಪಾಪ ಹೊರಬೇಕಲ್ಲ ಎಂಬ ಕಟು ಸತ್ಯ ಅರಿವಾಗಿ, ತೀವ್ರ ಪಶ್ಚಾತ್ತಾಪದಿಂದ ನಾರದ ಮುನಿಗಳ ಕಾಲಿಗೆ ಬಿದ್ದು ತನ್ನನ್ನು ಉದ್ಧಾರ ಮಾಡುವಂತೆ ಬೇಡಿಕೊಂಡನು.
ಆಗ ನಾರದ ಮುನಿಗಳು “ಶ್ರೀ ರಾಮ ನಾಮ ಜಪಿಸು” ಎಂದು ಹೇಳಿದರು. ಆದರೆ ರತ್ನಾಕರ ತನ್ನ ಜೀವನ ಪೂರ್ತಿ ಎಷ್ಟೋ ಪಾಪಗಳನ್ನು ಮಾಡಿದ್ದರಿಂದ ಆತನ ಬಾಯಿಂದ ‘ರಾಮ’ ಎಂಬ ಪವಿತ್ರ ಹೆಸರು ಉಚ್ಚರಿಸಲಾಗಲಿಲ್ಲ.
ನಂತರ ನಾರದ ಮುನಿಗಳ ಪ್ರೇರಣೆಯಿಂದ ‘ಮರಾ… ಮರಾ…‘ ಎಂಬ ಜಪವನ್ನು ಮಾಡುತ್ತಾ, ಅದೇ ಜಪ ‘ರಾಮ… ರಾಮ…‘ ಆಗಿ ರೂಪಾಂತರಗೊಂಡು, ತನ್ನ ಸುತ್ತ ಹುತ್ತವೇ ಬೆಳೆದರೂ ಲೆಕ್ಕಿಸದೆ ಮಾಡಿದ ದೀರ್ಘ ತಪಸ್ಸಿನ ನಂತರ ಅವರು ‘ವಾಲ್ಮೀಕಿ’ಯೆಂದು ಪ್ರಸಿದ್ಧರಾದರು. ರಾಮಾಯಣ ಮಹಾಕಾವ್ಯದ ಕೃತಿಕರ್ತನಾಗಿ, ಸೀತೆಗೆ ಆಶ್ರಯ ನೀಡಿ ಲವ-ಕುಶರಿಗೆ ಮಾರ್ಗದರ್ಶನ ನೀಡಿದ ಮಹಾನ್ ಋಷಿಯಾಗಿ ವಾಲ್ಮೀಕಿ ಅಮರರಾಗಿದ್ದಾರೆ.
ಇನ್ನು ವಿಷ್ಣುಪುರಾಣದ ಪ್ರಕಾರ, ಈ ಭೂಮಿಯ ಮೇಲೆ ಮೊದಲ ಬಾರಿಗೆ ಪಟ್ಟಾಭಿಷಿಕ್ತನಾದ ಚಕ್ರವರ್ತಿ ಪೃಥುವಿನ ತಂದೆ ವೇನ ಮಹಾರಾಜನು ಬೇಡ ನಾಯಕರ ಮೂಲಪುರುಷ ಎಂದು ಉಲ್ಲೇಖಿಸಲಾಗಿದೆ.
ಇವರ ಉಗಮದ ಬಗ್ಗೆ ಮತ್ತೊಂದು ಸ್ವಾರಸ್ಯಕರವಾದ ಕಥೆಯಿದೆ. ಮಹಾವಿಷ್ಣುವಿನ ಆರನೇ ಅವತಾರವಾದ ಪರಶುರಾಮನು, ಒಮ್ಮೆ ಭೂಮಿಯ ಮೇಲಿದ್ದ ಅಹಂಕಾರಿ ಮತ್ತು ದುಷ್ಟ ಕ್ಷತ್ರಿಯ ರಾಜರನ್ನು ಸಂಹಾರ ಮಾಡಲು ಶಪಥ ಮಾಡುತ್ತಾನೆ. ತನ್ನ ಕೊಡಲಿಯನ್ನು ಹಿಡಿದು ಸತತ ಇಪ್ಪತ್ತೊಂದು ಬಾರಿ ಭೂ ಪ್ರದಕ್ಷಿಣೆ ಮಾಡುತ್ತಾ ಕ್ಷತ್ರಿಯರ ಸಂಹಾರ ಮಾಡುತ್ತಾನೆ.
ಆ ಭೀಕರ ದಾಳಿಗೆ ಹೆದರಿದ ಕೆಲವು ಕ್ಷತ್ರಿಯ ರಾಜಕುಮಾರರು ಮತ್ತು ಯೋಧರು, ಪ್ರಾಣಭಯದಿಂದ ತಮ್ಮ ರಾಜ್ಯಗಳನ್ನು ಬಿಟ್ಟು ದಟ್ಟವಾದ ಕಾಡನ್ನು ಸೇರಿದರು. ಬೆಟ್ಟಗುಡ್ಡಗಳು ಮತ್ತು ನೀರಿನ ಮೂಲಗಳನ್ನು ತಮ್ಮ ಸುಪರ್ದಿಗೆ ತೆಗೆದುಕೊಂಡ ಅವರು, ನಿಧಾನವಾಗಿ ಬಿಲ್ಲುಗಾರಿಕೆ ಮತ್ತು ಬೇಟೆಯಾಡುವುದನ್ನು ರೂಢಿಸಿಕೊಂಡರು. ಕಾಡೇ ಅವರ ಮನೆಯಾಯಿತು.
ಆ ಸಮಯದಲ್ಲಿ ದಟ್ಟವಾದ ಕಾಡಿನಲ್ಲಿ ತಪಸ್ಸು ಮಾಡುತ್ತಿದ್ದ ಋಷಿಮುನಿಗಳಿಗೆ, ಮತ್ತು ಕಾಡಿನ ದಾರಿಯಲ್ಲಿ ಸಾಗುತ್ತಿದ್ದ ಮುಗ್ಧ ದಾರಿಹೋಕರಿಗೆ ಕಾಡುಮೃಗಗಳಿಂದ ಹಾಗೂ ಕಳ್ಳ-ಕಾಕರಿಂದ ಈ ವೀರರು ರಕ್ಷಣೆ ಒದಗಿಸಲು ಆರಂಭಿಸಿದರು. ಇವರ ಈ ನಿಸ್ವಾರ್ಥ ಸೇವೆ, ನಿಷ್ಠೆ ಮತ್ತು ಶೌರ್ಯವನ್ನು ಮೆಚ್ಚಿದ ಋಷಿಮುನಿಗಳು ಹಾಗೂ ಜನಸಾಮಾನ್ಯರು, ಇವರಿಗೆ ವಿಷ್ಣುವಿನ ಇನ್ನೊಂದು ಹೆಸರಾದ ‘ನಾಯಕ’ ಎಂಬ ಬಿರುದನ್ನು ಪ್ರೀತಿಯಿಂದ ನೀಡಿದರು ಎಂದು ಪುರಾಣಗಳು ಹೇಳುತ್ತವೆ. ‘ನಾಯಕ’ ಎಂದರೆ ಮುಂಚೂಣಿಯಲ್ಲಿ ನಿಂತು ರಕ್ಷಿಸುವವನು ಎಂದರ್ಥ. ಹೀಗೆ ಅರಣ್ಯ ಸೇರಿದ ಕ್ಷತ್ರಿಯ ಯೋಧರೇ ಮುಂದೆ ನಾಯಕ ಜನಾಂಗವಾಗಿ ಹೊರಹೊಮ್ಮಿದರು.
ಇತಿಹಾಸದಲ್ಲಿ ನಾಯಕ ಪದದ ಅರ್ಥ
ಪ್ರಾಚೀನ ಕಾಲದಿಂದಲೂ ಇವರು ಪ್ರಬಲ ಸೇನಾನಾಯಕರಾಗಿ, ಮುಖಂಡರಾಗಿ ಕಾರ್ಯನಿರ್ವಹಿಸುತ್ತಿದ್ದರು ಎಂದು ಕೆಲವು ಇತಿಹಾಸಕಾರರು ಅಭಿಪ್ರಾಯಪಡುತ್ತಾರೆ. ಸಂಸ್ಕೃತದಲ್ಲಿ ನಾಯಕ ಎಂದರೆ ಮುಖಂಡ, ಮಾರ್ಗದರ್ಶಕ ಎಂದರ್ಥ.
ಅಷ್ಟೇ ಅಲ್ಲದೇ, ಕರ್ನಾಟಕವನ್ನು ಆಳಿದ ಚಕ್ರವರ್ತಿ ಚಂದ್ರಹಾಸ, ನಿಷಾದ ದೇಶದ ಚಕ್ರವರ್ತಿ ನಳ ಮಹಾರಾಜ, ಹಿರಣ್ಯಧನುವಿನ ಪುತ್ರನಾದ ಏಕಲವ್ಯ ಮುಂತಾದ ಅನೇಕ ಅರಸರು ಇದೇ ನಾಯಕ ಜನಾಂಗದವರಾಗಿದ್ದಾರೆ.
ಮಹಾಭಾರತದ ಕುರುಕ್ಷೇತ್ರ ಯುದ್ಧದಲ್ಲಿ ಈ ಜನಾಂಗದ ವೀರರು ಕೌರವ ಮತ್ತು ಪಾಂಡವರ ಎರಡೂ ಪಕ್ಷಗಳ ಪರವಾಗಿ ನಿಂತು ತಮ್ಮ ಶೌರ್ಯ ಪ್ರದರ್ಶಿಸಿದ್ದರು ಎಂದು ತಿಳಿದುಬರುತ್ತದೆ. ಸಹದೇವನು ತಾನು ಮಾಡಿದ ರಾಜಸೂಯ ಯಾಗದ ದಕ್ಷಿಣ ಭಾರತದ ದಂಡಯಾತ್ರೆಯಲ್ಲಿ ಈ ಜನಾಂಗದವರನ್ನು ಎದುರಿಸಿದ್ದನು ಎಂಬ ಉಲ್ಲೇಖವೂ ಇದೆ.
ಬೇಡರ ಕಣ್ಣಪ್ಪನ ಭಕ್ತಿ ಪರಂಪರೆ
ಇನ್ನು ಈ ಸಮುದಾಯದ ಅದ್ಭುತ ಭಕ್ತಿ ಪರಂಪರೆಯನ್ನು ಹೇಳುವಾಗ ಬೇಡರ ಕಣ್ಣಪ್ಪನ ಕಥೆಯನ್ನು ಮರೆಯಲು ಸಾಧ್ಯವಿಲ್ಲ. ಅರಣ್ಯದಲ್ಲಿ ಬೇಟೆಗಾರನಾಗಿ ಬೆಳೆದ ಕಣ್ಣಪ್ಪ, ಶಿವನ ಮೇಲಿನ ತನ್ನ ನಿಷ್ಕಪಟ ಭಕ್ತಿಯಿಂದಾಗಿ ಅತ್ಯುನ್ನತ ಸ್ಥಾನ ಪಡೆದಿದ್ದಾನೆ.
ಶಿವಲಿಂಗದ ಕಣ್ಣಿನಿಂದ ರಕ್ತ ಹರಿಯುತ್ತಿರುವುದನ್ನು ಕಂಡು, ಆ ನೋವನ್ನು ಸಹಿಸಲಾರದೆ ತನ್ನದೇ ಕಣ್ಣನ್ನು ಕಿತ್ತು ಅರ್ಪಿಸಿ ಭಕ್ತಿಯ ಪರಾಕಾಷ್ಠೆಯನ್ನು ಮೆರೆದ ಮಹಾನ್ ಶಿವಭಕ್ತ ಕಣ್ಣಪ್ಪ.
ವೃತ್ತಿ ಮತ್ತು ಪಾಳೇಗಾರರ ವೈಭವ
ಈ ಸಮುದಾಯದವರ ಹಿಂದಿನ ವೃತ್ತಿಯ ಬಗ್ಗೆ ಮಾತನಾಡುವುದಾದರೆ, ಆರಂಭಿಕ ದಿನಗಳಲ್ಲಿ ಇವರು ಪ್ರಮುಖವಾಗಿ ಅರಣ್ಯವಾಸಿಗಳಾಗಿದ್ದರು. ಬೇಟೆ ಮತ್ತು ಅರಣ್ಯ ಸಂಪನ್ಮೂಲಗಳನ್ನು ಅವಲಂಬಿಸಿ ಜೀವನ ಸಾಗಿಸುತ್ತಿದ್ದರು.
ಅಸಾಧಾರಣ ದೈಹಿಕ ಬಲವನ್ನು ಹೊಂದಿದ್ದ ಇವರ ಪ್ರಮುಖ ಕಸುಬು ಬಿಲ್ಲುಗಾರಿಕೆ ಮತ್ತು ಶಸ್ತ್ರಾಸ್ತ್ರಗಳ ಬಳಕೆಯಾಗಿತ್ತು. ಆದರೆ ಕಾಲಕ್ರಮೇಣ ಇವರ ಶೌರ್ಯ, ನಿಷ್ಠೆ ಮತ್ತು ನಾಯಕತ್ವದ ಗುಣಗಳು ಇವರನ್ನು ಅಪ್ರತಿಮ ಯೋಧರನ್ನಾಗಿ ಮಾಡಿದವು. ಕಾಡಿನಲ್ಲಿ ದಾರಿಹೋಕರನ್ನು ರಕ್ಷಿಸುವ, ಸೈನ್ಯದ ಮುಂಚೂಣಿಯಲ್ಲಿ ನಿಂತು ಹೋರಾಡುವ ನಾಯಕರಾಗಿ ಇವರು ಹೊರಹೊಮ್ಮಿದರು.
ಶಕ್ತಿ ಮತ್ತು ಭಕ್ತಿಯ ಅದ್ಭುತ ಸಂಗಮವಾದ ಈ ಜನಾಂಗವು ನಂತರದ ದಿನಗಳಲ್ಲಿ ಕೇವಲ ಕಾಡಿನ ಯೋಧರಾಗಿ ಉಳಿಯದೆ, ಪಾಳೇಗಾರರಾಗಿ ಮತ್ತು ಬಲಿಷ್ಠ ಮಹಾರಾಜರಾಗಿ ನಾಡನ್ನು ಆಳಲು ಶುರುಮಾಡಿದರು.
ಕರ್ನಾಟಕದ ಉದ್ದಗಲಕ್ಕೂ ಸುಮಾರು 77 ಪ್ರಾಂತ್ಯಗಳನ್ನು ಆಳ್ವಿಕೆ ಮಾಡಿದ ಕೀರ್ತಿ ಈ ನಾಯಕ ಜನಾಂಗದ್ದಾಗಿದೆ. ವ್ಯವಸ್ಥಿತವಾಗಿ ಎತ್ತರವಾದ ಗುಡ್ಡಗಳ ಮೇಲೆ ಕೋಟೆಗಳನ್ನು ಕಟ್ಟಿ, ವೈರಿಗಳನ್ನು ಮುನ್ನುಗ್ಗದಂತೆ ತಡೆಯುವುದು ಮತ್ತು ನಾಡನ್ನು ರಕ್ಷಿಸುವುದು ಈ ಪಾಳೇಗಾರರ ಪ್ರಮುಖ ಕರ್ತವ್ಯವಾಗಿತ್ತು.
ಇಂದಿಗೂ ಕರ್ನಾಟಕದ ನೂರಾರು ಹಳ್ಳಿಗಳ ಹೆಸರುಗಳು ‘ನಾಯಕ’ ಎಂಬ ಪದವನ್ನು ಒಳಗೊಂಡಿದೆ. ಇದು ಇವರು ಆಳಿದ ವೈಭವದ ಕುರುಹಾಗಿದೆ.
ಪ್ರಖ್ಯಾತ ವೀರರು ಮತ್ತು ಅರಸರು
ಇನ್ನೂ ಈ ಸಮಾಜದ ಇತರ ಪ್ರಖ್ಯಾತ ವ್ಯಕ್ತಿಗಳನ್ನು ನೋಡುವುದಾದರೇ, ಚಿತ್ರದುರ್ಗದ ಏಳು ಸುತ್ತಿನ ಕೋಟೆಯನ್ನು ಆಳಿದ ಪಾಳೇಗಾರರಾದ ಗಂಡುಗಲಿ ಮದಕರಿ ನಾಯಕ, ಬಿಚ್ಚುಗತ್ತಿ ಭರಮಣ್ಣ ನಾಯಕ, ಮತ್ತು ತಿಮ್ಮಣ್ಣ ನಾಯಕ ಈ ಜನಾಂಗದ ಅಪ್ರತಿಮ ರತ್ನಗಳು. ವಿಜಯನಗರ ಸಾಮ್ರಾಜ್ಯಕ್ಕೆ ರಕ್ಷಣೆ ನೀಡಿದವರು ಇದೇ ನಾಯಕ ಪಾಳೇಗಾರರು.
ದಕ್ಷಿಣ ಭಾರತದ ಮೇಲೆ ಮುಸ್ಲಿಂ ಸುಲ್ತಾನರು ದಂಡೆತ್ತಿ ಬಂದಾಗ ಈ ಜನಾಂಗ ತೋರಿದ ಕೌಶಲವನ್ನು ಮರೆಯುವಂತೆಯೇ ಇಲ್ಲ. ವಿಜಯನಗರ ಸಾಮ್ರಾಜ್ಯದ ಪತನದ ನಂತರ, ಇಡೀ ದಕ್ಷಿಣ ಭಾರತ ದಿಕ್ಕುತಪ್ಪಿದ್ದಾಗ উত্তರದ ಮೊಘಲರು, ಬಿಜಾಪುರದ ಆದಿಲ್ ಶಾಹಿಗಳು ಮತ್ತು ಬಹಮನಿ ಸುಲ್ತಾನರು ಕರ್ನಾಟಕದ ಮೇಲೆ ಮುಗಿಬಿದ್ದರು.
ಆ ಕಷ್ಟಕಾಲದಲ್ಲಿ ಸುಮಾರು 200 ವರ್ಷಗಳಿಗೂ ಹೆಚ್ಚು ಕಾಲ ಈ ನಾಡನ್ನು, ಇಲ್ಲಿನ ಸಂಸ್ಕೃತಿಯನ್ನು ಮುಸ್ಲಿಂ ಸುಲ್ತಾನರ ದಾಳಿಯಿಂದ ರಕ್ಷಿಸಿದ ಕೀರ್ತಿ ಇದೇ ನಾಯಕ ಪಾಳೇಗಾರರಿಗೆ ಸಲ್ಲುತ್ತದೆ. ದೆಹಲಿಯ ಸುಲ್ತಾನರು ದಾಳಿ ಮಾಡಿದಾಗ ಕಂಪ್ಲಿ ಸಂಸ್ಥಾನದ ಕಂಪಿಲರಾಯ ಮಹಮದ್-ಬಿನ್-ತುಘಲಕ್ನ ಬೃಹತ್ ಸೇನೆಯ ವಿರುದ್ಧ ವೀರಾವೇಶದಿಂದ ಹೋರಾಡಿದನು.
ಹೈದರಾಲಿಯಂತಹ ಚತುರ ಪರಾಕ್ರಮಿ ನಾಲ್ಕು ಬಾರಿ ದಂಡೆತ್ತಿ ಬಂದರೂ ಆತನನ್ನು ಹೊಡೆದೋಡಿಸಿದ ಸಾಹಸ ಮದಕರಿ ನಾಯಕರದ್ದು. ಒಮ್ಮೆ ಯುದ್ಧಭೂಮಿಗೆ ಇಳಿದರೆ ಶತ್ರುಗಳನ್ನು ಸದೆಬಡಿಯದೆ ತನ್ನ ಕತ್ತಿಯನ್ನು ಕೆಳಗಿಡದ ‘ಬಿಚ್ಚುಗತ್ತಿ ಭರಮಣ್ಣ ನಾಯಕ’ನ ಶೌರ್ಯಕ್ಕೆ ಯಾರೂ ಸಾಟಿಯಿಲ್ಲ.
ಇನ್ನು ಕೆಳದಿ ಸಂಸ್ಥಾನವನ್ನು ಆಳಿದ ಶಿವಪ್ಪ ನಾಯಕರು, ಕರಾವಳಿ ಮತ್ತು ಮಲೆನಾಡು ಭಾಗಗಳಲ್ಲಿ ತಮ್ಮ ಸಾಮ್ರಾಜ್ಯವನ್ನು ವಿಸ್ತರಿಸಿ ಬಿಜಾಪುರದ ಸುಲ್ತಾನರಾದ ಆದಿಲ್ ಶಾಹಿಗಳನ್ನು ಹೀನಾಯವಾಗಿ ಸೋಲಿಸಿದರು.
ಇವರ ಜೊತೆಗೆ ತರೀಕೆರೆಯ ಸರ್ಜಾ ಹನುಮಪ್ಪ ನಾಯಕ, ಎಚ್ಚಮ ನಾಯಕ, ಹರಪನಹಳ್ಳಿ ಸೋಮಶೇಖರ ನಾಯಕರಂತಹ ಹಲವಾರು ಪಾಳೇಗಾರರು ಮುಸ್ಲಿಂ ಸುಲ್ತಾನರಿಗೆ ಸಿಂಹಸ್ವಪ್ನವಾಗಿದ್ದರು. ಈ ವೀರ ಸೇನಾನಿಗಳ ಸಾಹಸ, ಚಾಕಚಕ್ಯತೆ ಮತ್ತು ಗೆರಿಲ್ಲಾ ಯುದ್ಧತಂತ್ರಗಳು ಸುಲ್ತಾನರ ಬೃಹತ್ ಸೇನೆಗಳಿಗೂ ನಡುಕ ಹುಟ್ಟಿಸುತ್ತಿದ್ದವು. ಇವರು ಕೇವಲ ಯುದ್ಧವೀರರು ಮಾತ್ರವಾಗಿರದೆ ಧರ್ಮನಿಷ್ಠರೂ ಆಗಿದ್ದರು ಎಂಬುದಕ್ಕೆ ಅವರು ಸ್ಥಾಪಿಸಿದ ಅನೇಕ ಮಠ-ಮಂದಿರಗಳೇ ಇಂದಿಗೂ ಸಾಕ್ಷಿಯಾಗಿ ನಿಂತಿವೆ.
ಬ್ರಿಟಿಷರ ದಬ್ಬಾಳಿಕೆಯ ವಿರುದ್ಧ ಸಿಡಿದೆದ್ದ ಕಲಿಗಳಿಗೂ ಈ ಜನಾಂಗಕ್ಕೂ ಬಿಡಿಸಲಾರದ ನಂಟಿದೆ. ಸುರಪುರದ ರಾಜ ಚಿಕ್ಕ ವೆಂಕಟಪ್ಪ ನಾಯಕ, ಕೆಳದಿ ಚೆನ್ನಮ್ಮ, ವೀರ ಸಿಂಧೂರ ಲಕ್ಷ್ಮಣ ಮತ್ತು ಬ್ರಿಟಿಷರ ಶಸ್ತ್ರಾಸ್ತ್ರ ಕಾಯ್ದೆಯ ವಿರುದ್ಧ ಪ್ರಾಣವನ್ನೇ ಪಣಕ್ಕಿಟ್ಟು ಹೋರಾಡಿ ಸಿಂಹಸ್ವಪ್ನವಾಗಿದ್ದ ಹಲಗಲಿ ಬೇಡರು ಇದೇ ನಾಯಕ ಜನಾಂಗದ ಹೆಮ್ಮೆಯ ವೀರರು.
ಜನಸಂಖ್ಯೆ ಮತ್ತು ಭೌಗೋಳಿಕ ಹಂಚಿಕೆ
ಇನ್ನು ಈ ಜನಾಂಗದ ಜನಸಂಖ್ಯೆಯ ಬಗ್ಗೆ ಗಮನ ಹರಿಸಿದರೆ, ಜನಗಣತಿಯ ಅಂದಾಜಿನ ಪ್ರಕಾರ ರಾಜ್ಯದಲ್ಲಿ ಸುಮಾರು 40 ರಿಂದ 60 ಲಕ್ಷದಷ್ಟು ಜನಸಂಖ್ಯೆಯನ್ನು ಈ ಸಮುದಾಯ ಹೊಂದಿದೆ. ನಾಯಕ್, ವಾಲ್ಮೀಕಿ, ಬೇಡ, ಬೇಡರ್, ಪರಿವಾರ, ತಳವಾರ ಮುಂತಾದ ಪರ್ಯಾಯ ಹೆಸರುಗಳಿಂದಲೂ ಈ ಜನಾಂಗವನ್ನು ಕರೆಯಲಾಗುತ್ತದೆ.
ಇಂದಿನ ಸವಾಲುಗಳು
ಇಷ್ಟೊಂದು ಭವ್ಯವಾದ, ಶ್ರೀಮಂತ ಇತಿಹಾಸ ಹೊಂದಿರುವ ನಾಯಕ ಜನಾಂಗವು ಇಂದು ಹಲವಾರು ಸವಾಲುಗಳನ್ನು ಮತ್ತು ಸಂಕಷ್ಟಗಳನ್ನು ಎದುರಿಸುತ್ತಿದೆ.
ಹಾಗಿದ್ದರೂ, ಆಧುನಿಕ ಕಾಲದ ಬದಲಾವಣೆಯ ಗಾಳಿಗೆ ತೆರೆದುಕೊಂಡಿರುವ ನಾಯಕ ಸಮುದಾಯವು ನಿಧಾನವಾಗಿ ಪ್ರಗತಿಯತ್ತ ಹೆಜ್ಜೆ ಹಾಕುತ್ತಿದೆ. ತಮ್ಮ ಸಾಂಪ್ರದಾಯಿಕ ವೃತ್ತಿಗಳಿಂದ ಹೊರಬಂದು, ಆರ್ಥಿಕ, ಸಾಮಾಜಿಕ ಮತ್ತು ಶೈಕ್ಷಣಿಕ ಕ್ಷೇತ್ರಗಳಲ್ಲಿ ತಮ್ಮದೇ ಆದ ಭದ್ರವಾದ ಸ್ಥಾನವನ್ನು ಕಂಡುಕೊಳ್ಳುತ್ತಿದ್ದಾರೆ.
ಜಾತಿ ವ್ಯವಸ್ಥೆಯ ಸಂಕೋಲೆಗಳಿಂದ ಹೊರಬಂದು ಅಭಿವೃದ್ಧಿಯತ್ತ ಸಾಗುತ್ತಿದ್ದಾರೆ. ಇಂತಹ ಅದ್ಭುತ ಶೂರರ, ಸಾಮ್ರಾಜ್ಯಗಳನ್ನು ಕಟ್ಟಿದ ಜನಾಂಗವು ಶೈಕ್ಷಣಿಕವಾಗಿ ಮತ್ತು ಆರ್ಥಿಕವಾಗಿ ಮತ್ತಷ್ಟು ಪ್ರಬಲವಾಗಿ ಬೆಳೆದು ನಿಲ್ಲಬೇಕಾಗಿದೆ.
ವಾಲ್ಮೀಕಿ ನಾಯಕ ಜನಾಂಗವು ಧರ್ಮ ರಕ್ಷಣೆ, ನಾಡಿನ ಸ್ವಾತಂತ್ರ್ಯ ಮತ್ತು ಸಾಂಸ್ಕೃತಿಕ ಪರಂಪರೆಯನ್ನು ಎತ್ತಿಹಿಡಿಯುವಲ್ಲಿ ಮಹತ್ತರ ಪಾತ್ರ ವಹಿಸಿದೆ. ಇವರ ವೀರಗಾಥೆಗಳು ಹಾಗೂ ತ್ಯಾಗದ ಇತಿಹಾಸವು ಪ್ರತಿಯೊಬ್ಬ ಕನ್ನಡಿಗನಿಗೂ ಸದಾ ಪ್ರೇರಣೆಯಾಗಿದೆ.
ಈ ಮಾಹಿತಿ ನಿಮಗೆ ಉಪಯುಕ್ತವೆನಿಸಿದರೆ, ದಯವಿಟ್ಟು ನಿಮ್ಮ ಸ್ನೇಹಿತರು ಮತ್ತು ಇತರರೊಂದಿಗೆ ಹಂಚಿಕೊಳ್ಳಿ. ಇದೇ ರೀತಿ, ಇನ್ನಿತರ ವಿಷಯಗಳನ್ನೂ ಸಹ ನೀವು ನಮ್ಮ ಬ್ಲಾಗ್ ನಲ್ಲಿ ಓದಬಹುದು.
ಈ ಬ್ಲಾಗ್ನಲ್ಲಿರುವ ಎಲ್ಲಾ ವಿಷಯವು ಹಕ್ಕುಸ್ವಾಮ್ಯವನ್ನು ಹೊಂದಿದೆ ಮತ್ತು ಲೇಖಕರ ಅನುಮತಿಯಿಲ್ಲದೆ ನಕಲು ಮಾಡುವುದನ್ನು ಅನುಮತಿಸಲಾಗುವುದಿಲ್ಲ.
All content on this blog is copyrighted, and copying is not allowed without permission from the author.
