ಶ್ರೀ ಅಭಿನವ ಗವಿಸಿದ್ದೇಶ್ವರ ಸ್ವಾಮೀಜಿ ಜೀವನ ಚರಿತ್ರೆ | Abhinava Gavisiddheshwara Swamiji Biography in Kannada

abhinava gavisiddheshwara swamiji biography in kannada, gavi matha history in kannada, abhinava gavisiddheshwara swamiji speech kannada, koppal gavisiddeshwara jatre history in kannada, abhinava gavisiddheshwara swamiji miracles in kannada, gavi matha dasoha details kannada, abhinava gavisiddheshwara swamiji life story kannada, koppal gavisiddeshwara photos download kannada, abhinava gavisiddheshwara swamiji social work in kannada

ಉತ್ತರ ಕರ್ನಾಟಕದ ‘ಕುಂಭಮೇಳ’ ಎಂದು ಕರೆಯಲ್ಪಡುವ ಕೊಪ್ಪಳದ ಗವಿಸಿದ್ದೇಶ್ವರ ಜಾತ್ರೆಯಲ್ಲಿ ಲಕ್ಷಾಂತರ ಜನರು ಸೇರುತ್ತಾರೆ. ಆದರೆ ಅಲ್ಲಿಗೆ ಬರುವ ಪ್ರತಿಯೊಬ್ಬ ಭಕ್ತನ ಕಣ್ಣುಗಳು ಹುಡುಕುವುದು ಒಬ್ಬ ಮಹಾನ್ ಚೇತನವನ್ನ; ಅವರೇ ಶ್ರೀ ಅಭಿನವ ಗವಿಸಿದ್ದೇಶ್ವರ ಸ್ವಾಮೀಜಿಗಳು. 

ಸನ್ಯಾಸ ಎಂದರೆ ಕೇವಲ ಕೇಸರಿ ಬಟ್ಟೆ ಧರಿಸಿ ಮಠದೊಳಗೆ ಕುಳಿತು ಪೂಜೆ ಮಾಡುವುದಲ್ಲ, ಅದು ಸಮಾಜದ ಕಣ್ಣೀರನ್ನು ಒರೆಸುವ ಕಾಯಕ ಎಂದು ಜಗತ್ತಿಗೆ ತೋರಿಸಿಕೊಟ್ಟವರು ಈ ಸ್ವಾಮೀಜಿಗಳು. ಓದಿಗಾಗಿ ಮಠಕ್ಕೆ ಬಂದು, ಇಂದು ನಾಡನ್ನೇ ಬದಲಿಸುತ್ತಿರುವ ಈ ಮಹಾನ್ ಸ್ವಾಮೀಜಿಗಳ ಬದುಕು ಅಚ್ಚರಿ ಮತ್ತು ಅದ್ಭುತ. 

ಇಂದಿನ ಲೇಖನದಲ್ಲಿ ಶ್ರೀ ಅಭಿನವ ಗವಿಸಿದ್ದೇಶ್ವರ ಸ್ವಾಮೀಜಿ ಕುರಿತ ಸಂಪೂರ್ಣ ಮಾಹಿತಿಯನ್ನು ನೋಡೋಣ ಬನ್ನಿ.

ಶ್ರೀ ಅಭಿನವ ಗವಿಸಿದ್ದೇಶ್ವರ ಸ್ವಾಮೀಜಿ ಜೀವನ ಚರಿತ್ರೆ | Abhinava Gavisiddheshwara Swamiji Life Story in Kannada

ಹುಟ್ಟು ಮತ್ತು ಬಾಲ್ಯದ ಬಡತನ

ಈ ಮಹಾನ್ ಸಾಧಕರ ಬದುಕು ಆರಂಭವಾಗಿದ್ದು ಜೂನ್ 1, 1977 ರಂದು. ಅವರು ಹುಟ್ಟಿದ್ದು ಕಲಬುರಗಿ ಜಿಲ್ಲೆಯ ಅಫಜಲಪುರ ತಾಲ್ಲೂಕಿನ ಹಾಗರಗುಂಡಿ ಎಂಬ ಪುಟ್ಟ ಹಳ್ಳಿಯಲ್ಲಾದರೂ, ಇವರ ಮೂಲ ಮನೆತನ ವಿಜಯಪುರ ಜಿಲ್ಲೆಯ ಸಿಂದಗಿ ತಾಲ್ಲೂಕಿನ ಆಹೆರಿ ಗ್ರಾಮದ್ದು. 

ನೀಲಯ್ಯ ಮತ್ತು ಈರಮ್ಮ ದಂಪತಿಗಳ ಮೂವರು ಮಕ್ಕಳಲ್ಲಿ ಇವರೇ ಹಿರಿಯವರು. ಅವರಿಗೆ ಆಸ್ತಿ ಅಂತಾ ಇದ್ದದ್ದು ಬಡತನವೊಂದೇ; ಎಷ್ಟೋ ದಿನಗಳು ಅವರ ಮನೆಯಲ್ಲಿ ಒಲೆ ಉರಿಯುತ್ತಿರಲಿಲ್ಲ. ಹನಿ ನೀರಿಗೂ ಪರದಾಡುತ್ತಿದ್ದ ಆ ಬರಡು ಭೂಮಿಯಲ್ಲಿ, ಹೊಟ್ಟೆ ತುಂಬಾ ಊಟ ಮಾಡುವುದು ದೊಡ್ಡ ಕನಸಾಗಿತ್ತು.

ಶ್ರೀ ಅಭಿನವ ಗವಿಸಿದ್ದೇಶ್ವರ ಸ್ವಾಮೀಜಿಗಳ ಬಾಲ್ಯದ ಹೆಸರು ಪರುತಯ್ಯ. ಪರುತಯ್ಯನವರಿಗೆ ಓದಬೇಕೆಂಬ ಹಂಬಲವಿತ್ತು, ಆದರೆ ಕುಟುಂಬದ ಪರಿಸ್ಥಿತಿ ಕೆಟ್ಟದಾಗಿತ್ತು. ಬಾಲ್ಯದಲ್ಲಿ ಶಾಲೆಗೆ ಹೋಗಲು ಸರಿಯಾದ ಬಟ್ಟೆಗಳಿಲ್ಲದೆ, ಹರಿದ ಚೀಲವನ್ನೇ ಪುಸ್ತಕದ ಚೀಲವನ್ನಾಗಿ ಮಾಡಿಕೊಂಡು ಕಿಲೋಮೀಟರ್‌ಗಟ್ಟಲೆ ಬರಿಗಾಲಿನಲ್ಲಿ ನಡೆಯುತ್ತಿದ್ದರು. 

ಬಡತನದ ಬೇಗೆ ತಾಳಲಾರದೆ, ಓದಿನ ಆಸೆಯಿಂದ ಕೇವಲ ಒಬ್ಬ ಸಾಮಾನ್ಯ ವಿದ್ಯಾರ್ಥಿಯಾಗಿ ಕೊಪ್ಪಳದ ಗವಿಮಠದ ಬಾಗಿಲು ತಟ್ಟಿದರು. ತಂದೆ-ತಾಯಿಯನ್ನು ಬಿಟ್ಟು ಮಠದಲ್ಲಿ ಉಳಿದುಕೊಂಡಾಗ ಆ ಬಾಲಕನಿಗೆ ಕಾಡಿದ್ದು ಅತೀವ ಒಂಟಿತನ. ಆದರೆ ಆ ಒಂಟಿತನವನ್ನೇ ಅವರು ಓದಿನ ಶಕ್ತಿಯನ್ನಾಗಿ ಬದಲಿಸಿಕೊಂಡರು. ಮಠದ ದಾಸೋಹದ ಅನ್ನವೇ ಅವರ ಪ್ರಾಣ ಉಳಿಸಿತು.

ಮಠಕ್ಕೆ ಆಗಮನ ಮತ್ತು ಶಿಕ್ಷಣದ ಹಾದಿ

17ನೇ ಪೀಠಾಧಿಪತಿಗಳಾದ ಶ್ರೀ ಶಿವಶಾಂತವೀರ ಮಹಾಸ್ವಾಮಿಗಳ ಮಾರ್ಗದರ್ಶನದಲ್ಲಿ ಮಠದಲ್ಲೇ ತಮ್ಮ ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣ ಮುಗಿಸಿದ ಇವರು ಕೇವಲ ಆಧ್ಯಾತ್ಮಿಕ ಶಿಕ್ಷಣಕ್ಕೆ ಮಾತ್ರ ಸೀಮಿತವಾಗಲಿಲ್ಲ. ಗುಲಬುರ್ಗಾ ವಿಶ್ವವಿದ್ಯಾಲಯದಲ್ಲಿ ಪದವಿ ಓದುವಾಗ ಇಡೀ ವಿಶ್ವವಿದ್ಯಾಲಯಕ್ಕೆ 6ನೇ ರ‍್ಯಾಂಕ್ ಪಡೆದು ಸಾಧನೆ ಮಾಡಿದರು. 

ನಂತರ ಸಂಸ್ಕೃತದಲ್ಲಿ ಎಂ.ಎ ಪದವಿ ಪಡೆಯಲು ತಿರುಪತಿಗೆ ತೆರಳಿದರು. ಅಷ್ಟೇ ಅಲ್ಲದೆ, ಪುಣೆಯಲ್ಲಿ ಇಂಗ್ಲಿಷ್ ಸಾಹಿತ್ಯ ಮತ್ತು ಫಿಲಾಸಫಿಯಲ್ಲಿ ಸ್ನಾತಕೋತ್ತರ ಪದವಿ ಪಡೆದರು. ಹೀಗೆ ಅವರು ಇಂಗ್ಲಿಷ್, ಕನ್ನಡ ಮತ್ತು ಸಂಸ್ಕೃತ ಮೂರೂ ಭಾಷೆಗಳಲ್ಲಿ ಅಪ್ರತಿಮ ಪಾಂಡಿತ್ಯ ಸಾಧಿಸಿದರು.

ಪೀಠಾರೋಹಣ ಮತ್ತು ಸಂಕಲ್ಪ

ಅಭಿನವ ಗವಿಸಿದ್ದೇಶ್ವರ ಸ್ವಾಮೀಜಿಗಳಿಗಿಂತ ಮೊದಲು ಗವಿಮಠವನ್ನು ಶ್ರೀ ಶಿವಶಾಂತವೀರ ಮಹಾಸ್ವಾಮಿಗಳು ಮುನ್ನಡೆಸುತ್ತಿದ್ದರು. ಅವರು ಸುಮಾರು 30 ವರ್ಷಗಳ ಕಾಲ ಮಠದ ಪರಂಪರೆಯನ್ನು ಕಾಪಾಡಿಕೊಂಡು ಬಂದವರು. ಅವರು ಕೇವಲ ಗುರುಗಳಾಗಿರಲಿಲ್ಲ, ಪರುತಯ್ಯ ಎಂಬ ಬಡ ಹುಡುಗನಲ್ಲಿದ್ದ ದಿವ್ಯ ಶಕ್ತಿಯನ್ನು ಮೊದಲೇ ಗುರುತಿಸಿದ ದಾರ್ಶನಿಕರಾಗಿದ್ದರು. ಪರುತಯ್ಯನವರ ನಿಷ್ಕಲ್ಮಶ ಭಕ್ತಿ ಮತ್ತು ಜ್ಞಾನವನ್ನು ಕಂಡ ಶಿವಶಾಂತವೀರ ಸ್ವಾಮೀಜಿಗಳು, ಇವರನ್ನೇ ಮಠದ ಉತ್ತರಾಧಿಕಾರಿಯನ್ನಾಗಿ ಆಯ್ಕೆ ಮಾಡಿದರು.

2002ರ ನವೆಂಬರ್ 16ರಂದು ಶ್ರೀ ಶಿವಶಾಂತವೀರ ಸ್ವಾಮೀಜಿಗಳ ಲಿಂಗೈಕ್ಯದ ನಂತರ, ಅವರ ಆಶಯದಂತೆಯೇ ಡಿಸೆಂಬರ್ 13, 2002 ರಂದು ಪರುತಯ್ಯನವರಿಗೆ ಶಾಸ್ತ್ರೋಕ್ತವಾಗಿ ಪಟ್ಟಾಭಿಷೇಕ ಮಾಡಲಾಯಿತು. 

ಅಂದು ಕೇವಲ 25 ವರ್ಷದ ಯುವಕನಾಗಿದ್ದ ಇವರು, ಗವಿಮಠದ 18ನೇ ಪೀಠಾಧಿಪತಿಯಾಗಿ ‘ಅಭಿನವ ಗವಿಸಿದ್ದೇಶ್ವರ ಸ್ವಾಮೀಜಿ’ ಎಂಬ ಹೆಸರಿನೊಂದಿಗೆ ಅಧಿಕಾರ ಸ್ವೀಕರಿಸಿದರು. ಪೀಠವೇರಿದ ನಂತರ ಅವರು ಮಠವನ್ನು ಕೇವಲ ಧಾರ್ಮಿಕ ಕೇಂದ್ರವಾಗಿ ಉಳಿಸಲಿಲ್ಲ. ಬದಲಾಗಿ ಬರಗಾಲದಿಂದ ಬಳಲುತ್ತಿದ್ದ ಕೊಪ್ಪಳ ಭಾಗದ ಜನರಿಗೆ ಆಸರೆಯಾಗುವ ಸಂಕಲ್ಪ ಮಾಡಿದರು.

​ಜಲಋಷಿಯ ಜಲಕ್ರಾಂತಿ

ಸ್ವಾಮೀಜಿಗಳ ಅತಿದೊಡ್ಡ ಸಾಧನೆ ಎಂದರೆ ಅದು ಜಲಸಂರಕ್ಷಣೆ. ಕೊಪ್ಪಳ ಜಿಲ್ಲೆ ತೀವ್ರ ನೀರಿನ ಸಮಸ್ಯೆಯಿಂದ ಬಳಲುತ್ತಿದ್ದಾಗ ಸರ್ಕಾರಗಳು ಮಾಡದ ಕೆಲಸವನ್ನ ಸ್ವಾಮೀಜಿಗಳು ಭಕ್ತರ ಸಹಯೋಗದೊಂದಿಗೆ ಆರಂಭಿಸಿದರು. 2022ರಲ್ಲಿ ಗಿಣಗೇರ ಕೆರೆ ಸೇರಿದಂತೆ ಹಲವಾರು ಕೆರೆಗಳ ಹೂಳೆತ್ತುವ ಕಾರ್ಯವನ್ನು ಸ್ವತಃ ತಾವೇ ಮುಂದೆ ನಿಂತು ಮಾಡಿಸಿದರು. 

ಕೇವಲ ಮಠದ ಹಣವಲ್ಲದೆ, ಜನರಿಂದ ಶ್ರಮದಾನವನ್ನೇ ದಾನವಾಗಿ ಪಡೆದರು. ಈ ಕಾಯಕದಿಂದಾಗಿ ಇಡೀ ನಾಡು ಇವರನ್ನು ಪ್ರೀತಿಯಿಂದ ‘ಜಲಋಷಿ’ ಎಂದು ಕರೆಯಲಾರಂಭಿಸಿತು. ಅವರು ಹೂಳೆತ್ತಿದ ಕೆರೆಗಳು ಇಂದು ಸಾವಿರಾರು ಎಕರೆ ಭೂಮಿಗೆ ನೀರುಣಿಸುತ್ತಿವೆ ಮತ್ತು ಸಾವಿರಾರು ಹಳ್ಳಿಗಳ ಅಂತರ್ಜಲ ಮಟ್ಟವನ್ನು ಹೆಚ್ಚಿಸಿವೆ.

ತ್ರಿವಿಧ ದಾಸೋಹ ಮತ್ತು ಸಾಮಾಜಿಕ ಕ್ರಾಂತಿ

ಗವಿಮಠ ಎಂದರೆ ಅದು ‘ತ್ರಿವಿಧ ದಾಸೋಹ‘ದ ಕೇಂದ್ರ; ಅಂದರೆ ಅನ್ನ, ಅಕ್ಷರ ಮತ್ತು ಆಶ್ರಯವನ್ನು ದಾನ ಮಾಡುವ ಸ್ಥಳ. ಪ್ರತಿದಿನ ಸಾವಿರಾರು ಮಕ್ಕಳು ಇಲ್ಲಿ ಉಚಿತವಾಗಿ ಅನ್ನ ಪ್ರಸಾದ ಸ್ವೀಕರಿಸುತ್ತಾರೆ. “ತನಗೆ ಅನ್ನ ನೀಡಿದ್ದ ಈ ಮಠ, ನಾಡಿನ ಮಕ್ಕಳ ಹಸಿವನ್ನೂ ನೀಗಿಸಬೇಕು” ಎನ್ನುವುದು ಶ್ರೀಗಳ ಸಂಕಲ್ಪ. 

ಇಂದಿಗೂ ಅವರು ಪ್ರತಿದಿನ ಸಾವಿರಾರು ಮಕ್ಕಳಿಗೆ ಬಡಿಸುವ ಅಡುಗೆಯ ಗುಣಮಟ್ಟವನ್ನು ತಾವೇ ಪರೀಕ್ಷಿಸುತ್ತಾರೆ. ಜಾತ್ರೆಯ ಸಮಯದಲ್ಲಿ ಒಂದೇ ಬಾರಿಗೆ ಲಕ್ಷಾಂತರ ಜನರಿಗೆ ಊಟ ಬಡಿಸುವ ಆ ಶಿಸ್ತು ಮತ್ತು ವ್ಯವಸ್ಥೆಯನ್ನು ಕಂಡು ವಿದೇಶಿಗರೇ ಬೆರಗಾಗಿದ್ದಾರೆ.​

ಸ್ವಾಮೀಜಿಗಳು ಬರೀ ಶಾಲೆಗಳನ್ನು ಕಟ್ಟಲಿಲ್ಲ, ಬದಲಾಗಿ ಬಡ ರೈತರ ಮಕ್ಕಳು ಐಎಎಸ್, ಐಪಿಎಸ್ ಅಧಿಕಾರಿಗಳಾಗಬೇಕು ಎಂದು ಕನಸು ಕಂಡರು. ಅವರ ಸ್ವಂತ ಆಸಕ್ತಿಯಿಂದ ನಿರ್ಮಾಣವಾದ ‘ಡಿಜಿಟಲ್ ಲೈಬ್ರರಿ‘ ಇಂದು ಕೊಪ್ಪಳದ ಕೀರ್ತಿ ಹೆಚ್ಚಿಸಿದೆ. 

ಕೇವಲ ಪುಸ್ತಕಗಳಲ್ಲ, ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ಬೇಕಾದ ತರಬೇತಿಯನ್ನೂ ಮಠದ ವತಿಯಿಂದ ಕೊಡಿಸಿದರು. ಇದರ ಫಲವಾಗಿ ಇತ್ತೀಚೆಗೆ 28ಕ್ಕೂ ಹೆಚ್ಚು ಬಡ ವಿದ್ಯಾರ್ಥಿಗಳು ಪೊಲೀಸ್ ಕಾನ್ಸ್ಟೇಬಲ್ ಆಗಿ ಆಯ್ಕೆಯಾದಾಗ, ಶ್ರೀಗಳ ಕಣ್ಣಲ್ಲಿ ಒಬ್ಬ ತಂದೆಯ ಮಮತೆ ಇತ್ತು.​

ಕೋವಿಡ್ ಮಹಾಮಾರಿಯ ಸಮಯದಲ್ಲಿ ಇಡೀ ಜಗತ್ತು ಮನೆಯೊಳಗೆ ಅಡಗಿದ್ದಾಗ, ಸ್ವಾಮೀಜಿಗಳು ಮಠದ ಆವರಣವನ್ನೇ ಆಸ್ಪತ್ರೆಯಾಗಿ ಬದಲಿಸಿದರು. ಭಕ್ತರು ನೀಡಿದ ಕಾಣಿಕೆಯೇ ಭಕ್ತರ ಪ್ರಾಣ ಉಳಿಸಲು ಬಳಕೆಯಾಗಲಿ ಎಂದು ಅತ್ಯಾಧುನಿಕ ಐಸಿಯು ಬೆಡ್‌ಗಳನ್ನು ವ್ಯವಸ್ಥೆ ಮಾಡಿದರು. 

ಅಷ್ಟೇ ಅಲ್ಲದೆ, ನಡೆಯಲಾಗದ ಸಾವಿರಾರು ವಿಕಲಚೇತನರಿಗೆ ‘ಕೃತಕ ಕಾಲು’ಗಳನ್ನು ಉಚಿತವಾಗಿ ಕೊಡಿಸಿ, ಅವರ ಮುಖದಲ್ಲಿ ಮಂದಹಾಸ ಮೂಡಿಸಿದರು. 

ಶ್ರೀಗಳು ಕೇವಲ ಆಧ್ಯಾತ್ಮದ ಮಂತ್ರಗಳನ್ನು ಜಪಿಸಲಿಲ್ಲ, ಮಣ್ಣಿನ ಮಂತ್ರವನ್ನೂ ಜಪಿಸಿದರು. ಮಿಯಾವಾಕಿ ಪದ್ಧತಿಯ ಮೂಲಕ ಬರಡು ಭೂಮಿಯನ್ನು ಹಸಿರು ಕಾಡನ್ನಾಗಿ ಮಾಡುವ ಇವರ ಸಾಹಸ ಇಂದು ಇಡೀ ದೇಶಕ್ಕೆ ಮಾದರಿಯಾಗಿದೆ.

ಜಾತ್ರೆಯ ಹೊಸ ಸ್ವರೂಪ

ಸಾಮಾನ್ಯವಾಗಿ ಜಾತ್ರೆ ಎಂದರೆ ಮನರಂಜನೆ, ವ್ಯಾಪಾರ. ಆದರೆ ಅಭಿನವ ಗವಿಸಿದ್ದೇಶ್ವರ ಸ್ವಾಮೀಜಿಗಳು ಈ ಜಾತ್ರೆಯನ್ನೇ ‘ಸಾಮಾಜಿಕ ಬದಲಾವಣೆಯ ಶಕ್ತಿ’ಯಾಗಿ ರೂಪಿಸಿದರು. ಪ್ರತಿ ವರ್ಷ ರಥ ಎಳೆಯುವ ಮೊದಲು ಅವರು ಒಂದು ವಿಶಿಷ್ಟವಾದ ‘ಸಮಾಜ ಸುಧಾರಣೆಯ ಸಂಕಲ್ಪ’ ಮಾಡಿಸುತ್ತಾರೆ. 

“ನಮ್ಮ ರಕ್ತ ಬೇರೆಯವರ ನಾಡಿಯಲ್ಲಿ ಹರಿಯಲಿ” ಎಂಬ ಶ್ರೀಗಳ ಕರೆಗೆ ಓಗೊಟ್ಟು 2015 ರಿಂದ ಇಲ್ಲಿಯವರೆಗೆ ಸಾವಿರಾರು ಯುವಕರು ಸ್ವಯಂಪ್ರೇರಿತರಾಗಿ ರಕ್ತದಾನ ಮಾಡುತ್ತಿದ್ದಾರೆ.​

ಇತ್ತೀಚೆಗೆ ಶ್ರೀಗಳು ‘ಅಂಗಾಂಗ ದಾನ’ದ ಬಗ್ಗೆ ನೀಡಿದ ಕರೆ ಇಡೀ ರಾಜ್ಯದಲ್ಲಿ ಸಂಚಲನ ಮೂಡಿಸಿತು. “ಸತ್ತ ನಂತರ ಮಣ್ಣಾಗುವ ನಮ್ಮ ದೇಹ ಇನ್ನೊಬ್ಬರಿಗೆ ದೃಷ್ಟಿ ನೀಡಲಿ, ಜೀವ ನೀಡಲಿ” ಎಂಬ ಅವರ ಮಾತು ಕೇಳಿ ಲಕ್ಷಾಂತರ ಭಕ್ತರು ಅಂಗಾಂಗ ದಾನಕ್ಕೆ ಸಹಿ ಹಾಕಿದರು. 

“ಕುಡಿತ, ಧೂಮಪಾನ ಬಿಟ್ಟು ತಂದೆ-ತಾಯಿಯನ್ನು ಗೌರವಿಸಿ, ದೇಶ ಕಟ್ಟಲು ಮುಂದಾಗಿ” ಎಂದು ಅವರು ಹೇಳುವಾಗ ಯುವಕರಲ್ಲಿ ಹೊಸ ಸಂಚಲನ ಮೂಡುತ್ತದೆ.

ಒಬ್ಬ ವ್ಯಕ್ತಿ ಮನಸ್ಸು ಮಾಡಿದರೆ ಒಂದು ನಾಡನ್ನೇ ಹೇಗೆ ಬದಲಿಸಬಹುದು ಎಂಬುದಕ್ಕೆ ಶ್ರೀ ಅಭಿನವ ಗವಿಸಿದ್ದೇಶ್ವರ ಸ್ವಾಮೀಜಿಗಳೇ ಸಾಕ್ಷಿ. ಬಡತನದಲ್ಲಿ ಹುಟ್ಟಿ, ಓದಿಗಾಗಿ ಮಠಕ್ಕೆ ಬಂದು, ಇಂದು ಕೋಟ್ಯಂತರ ಜನರ ಬದುಕಿನಲ್ಲಿ ಭರವಸೆಯ ಬೆಳಕಾಗಿರುವ ಇವರ ಬದುಕು ನಮಗೆಲ್ಲರಿಗೂ ಆದರ್ಶ. ಇಂತಹ ಮಹಾನ್ ಸಾಧಕರ ಜೀವನದ ಹಾದಿ ಸಮಾಜಕ್ಕೆ ಎಂದೆಂದಿಗೂ ಸ್ಫೂರ್ತಿ.

ಈ ಮಾಹಿತಿ ನಿಮಗೆ ಉಪಯುಕ್ತವೆನಿಸಿದರೆ, ದಯವಿಟ್ಟು ನಿಮ್ಮ ಸ್ನೇಹಿತರು ಮತ್ತು ಇತರರೊಂದಿಗೆ ಹಂಚಿಕೊಳ್ಳಿ.

ಈ ಬ್ಲಾಗ್‌ನಲ್ಲಿರುವ ಎಲ್ಲಾ ವಿಷಯವು ಹಕ್ಕುಸ್ವಾಮ್ಯವನ್ನು ಹೊಂದಿದೆ ಮತ್ತು ಲೇಖಕರ ಅನುಮತಿಯಿಲ್ಲದೆ ನಕಲು ಮಾಡುವುದನ್ನು ಅನುಮತಿಸಲಾಗುವುದಿಲ್ಲ.

All content on this blog is copyrighted, and copying is not allowed without permission from the author.