Shetty community history in Kannada, Bunt caste origin Kannada, Shetty caste history in Kannada, Shetty surname meaning Kannada, coastal Karnataka Shetty history Kannada, Bunt Shetty tradition Kannada, Shetty family history Kannada, Bunt community culture Kannada, Mangalore Shetty history Kannada, Bunt Shetty customs and traditions Kannada
ಭಾರತದ, ವಿಶೇಷವಾಗಿ ಕರ್ನಾಟಕದ ಕರಾವಳಿ ಭಾಗದ ಬಗ್ಗೆ ಮಾತನಾಡುವಾಗ ‘ಶೆಟ್ಟಿ’ ಎಂಬ ಹೆಸರನ್ನು ಕೇಳದವರಿಲ್ಲ. ಸ್ಯಾಂಡಲ್ವುಡ್ ನಿಂದ ಬಾಲಿವುಡ್‌ನವರೆಗೆ, ಬೃಹತ್ ಹೋಟೆಲ್ ಉದ್ಯಮದಿಂದ ಹಿಡಿದು ದೇಶದ ಪ್ರತಿಷ್ಠಿತ ಬ್ಯಾಂಕಿಂಗ್ ಮತ್ತು ವೈದ್ಯಕೀಯ ಕ್ಷೇತ್ರದವರೆಗೆ ಶೆಟ್ಟಿ ಸಮುದಾಯದವರ ಸಾಧನೆ ಅಪಾರವಾಗಿದೆ. ಆದರೆ, ಈ ‘ಶೆಟ್ಟಿ’ ಎಂಬ ಪದದ ಹಿಂದಿರುವ ಸಾವಿರಾರು ವರ್ಷಗಳ ರೋಚಕ ಇತಿಹಾಸ ನಿಮಗೆ ಗೊತ್ತಾ? ಕರಾವಳಿಯ ಮಣ್ಣಿನಲ್ಲಿ ಕೃಷಿಕರಾಗಿ, ವೀರ ಯೋಧರಾಗಿ ಮೆರೆದ ಈ ಸಮುದಾಯ, ಮುಂಬೈಗೆ ವಲಸೆ ಹೋಗಿ ಹೋಟೆಲ್ ಸಾಮ್ರಾಜ್ಯವನ್ನು ಕಟ್ಟಿದ್ದು ಹೇಗೆ? 1974ರ ಭೂ ಸುಧಾರಣಾ ಕಾಯ್ದೆ ಇವರ ಬದುಕನ್ನು ಹೇಗೆ ಬದಲಾಯಿಸಿತು? ಹೀಗೆ ಈ ಸಮುದಾಯದ ಕುರಿತ ಪ್ರತಿಯೊಂದು ರೋಚಕ ಮಾಹಿತಿಯನ್ನು ಈ ಲೇಖನದಲ್ಲಿ ನೋಡೋಣ ಬನ್ನಿ.
Table of Contents
ಶೆಟ್ಟಿ ಸಮುದಾಯದ ಇತಿಹಾಸ: ಕರಾವಳಿಯ ಕೃಷಿಕರಿಂದ ಹೋಟೆಲ್ ಸಾಮ್ರಾಜ್ಯದವರೆಗೆ | Shetty Caste History in Kannada
ಶೆಟ್ಟಿ ಪದದ ಮೂಲ, ಬಂಟರ ಉಗಮ ಮತ್ತು ಪೌರಾಣಿಕ ಹಿನ್ನೆಲೆ
‘ಶೆಟ್ಟಿ’ ಎಂಬ ಪದದ ಇತಿಹಾಸವನ್ನು ಕೆದಕುತ್ತಾ ಹೋದರೆ, ಅದು ಪ್ರಾಚೀನ ಸಂಸ್ಕೃತ ಭಾಷೆಯ ‘ಶ್ರೇಷ್ಠಿ’ ಎಂಬ ಪದದಿಂದ ಹುಟ್ಟಿಕೊಂಡಿರುವುದು ಸ್ಪಷ್ಟವಾಗುತ್ತದೆ. ಶ್ರೇಷ್ಠಿ ಎಂದರೆ ಸಮಾಜದ ಶ್ರೇಷ್ಠ ವ್ಯಕ್ತಿ, ಮುಖಂಡ, ಅಥವಾ ವ್ಯಾಪಾರಿಗಳ ಮತ್ತು ಕೃಷಿಕರ ನಾಯಕ ಎಂದರ್ಥ.
ಕಾಲಕ್ರಮೇಣ ಈ ಸಂಸ್ಕೃತ ಪದವು ಸ್ಥಳೀಯ ಪ್ರಾಕೃತ ಮತ್ತು ದ್ರಾವಿಡ ಭಾಷೆಗಳ ಪ್ರಭಾವದಿಂದ ‘ಸೆಟ್ಟಿ’, ‘ಚೆಟ್ಟಿ’ ಮತ್ತು ‘ಶೆಟ್ಟಿ’ ಎಂದು ಬದಲಾಯಿತು ಎಂದು ಹೇಳಲಾಗುತ್ತದೆ. ಕರ್ನಾಟಕದ ಒಳನಾಡಿನಲ್ಲಿ ಬೇರೆ ಸಮುದಾಯದ ವ್ಯಾಪಾರಿ ವರ್ಗದವರೂ ಸಹ ಶೆಟ್ಟಿ ಎಂಬ ಹೆಸರನ್ನು ಬಳಸುತ್ತಾರಾದರೂ, ಕರಾವಳಿ ಕರ್ನಾಟಕದಲ್ಲಿ ಇದು ‘ಬಂಟ’ ಸಮುದಾಯದ ಅತ್ಯಂತ ಜನಪ್ರಿಯವಾದ ಉಪನಾಮವಾಗಿದೆ.
‘ಬಂಟ’ ಎಂದರೆ ತುಳು ಮತ್ತು ಹಳೆಗನ್ನಡದಲ್ಲಿ ಬಂಟರು, ವೀರರು, ಯೋಧರು ಅಥವಾ ರಕ್ಷಕರು ಎಂದರ್ಥ. ಪುರಾಣಗಳ ಪ್ರಕಾರ, ಪರಶುರಾಮನು ಸಮುದ್ರವನ್ನು ಹಿಂದಕ್ಕೆ ಸರಿಸಿ ನಿರ್ಮಿಸಿದ ಭೂಮಿಯೇ ಇಂದಿನ ತುಳುನಾಡು. ಈ ಕರಾವಳಿಯ ದಟ್ಟವಾದ ಕಾಡುಗಳನ್ನು ಕಡಿದು, ಅಲ್ಲಿಂದ ಬಂಜರು ಭೂಮಿಯನ್ನು ಫಲವತ್ತಾದ ಕೃಷಿಭೂಮಿಯನ್ನಾಗಿ ಪರಿವರ್ತಿಸಿದ ಮೂಲನಿವಾಸಿಗಳು ಇವರೇ ಎಂದು ಇತಿಹಾಸಕಾರರು ಹೇಳುತ್ತಾರೆ.
ಆರಂಭದಲ್ಲಿ ಕೃಷಿಯೇ ಇವರ ಮೂಲ ಕಸುಬಾಗಿತ್ತು. ಆದರೆ ಅರಣ್ಯದ ಕಾಡುಮೃಗಗಳಿಂದ ಮತ್ತು ಶತ್ರುಗಳಿಂದ ತಮ್ಮ ಭೂಮಿ ಹಾಗೂ ಜನರನ್ನು ರಕ್ಷಿಸಲು ಇವರು ಶಸ್ತ್ರಾಸ್ತ್ರಗಳನ್ನು ಹಿಡಿಯಬೇಕಾಯಿತು. ಹೀಗೆ ಕೃಷಿಕರಾಗಿದ್ದವರು ಸಮರ ಕಲೆಯನ್ನು ಕರಗತ ಮಾಡಿಕೊಂಡು ಯೋಧರಾಗಿ, ಊರಿನ ರಕ್ಷಕರಾಗಿ, ಆಡಳಿತಗಾರರಾಗಿ ಬೆಳೆದರು. ಇವರು ಮೂಲತಃ ನಾಗವಂಶದ ಕ್ಷತ್ರಿಯರು ಎಂಬ ನಂಬಿಕೆಯೂ ಇತಿಹಾಸದಲ್ಲಿದೆ.
ಪ್ರಾಚೀನ ಮತ್ತು ಮಧ್ಯಕಾಲೀನ ಇತಿಹಾಸ: ಆಳುಪರ ಆಡಳಿತ ಮತ್ತು ಪಾಳೇಗಾರರು
ಶೆಟ್ಟಿ ಮತ್ತು ಬಂಟ ಸಮುದಾಯದ ನಿಜವಾದ ರಾಜಕೀಯ ಶಕ್ತಿ ಮತ್ತು ಆಡಳಿತ ವೈಖರಿ ನಮಗೆ ಸ್ಪಷ್ಟವಾಗಿ ಗೋಚರಿಸುವುದು ಮಧ್ಯಕಾಲೀನ ಇತಿಹಾಸದಲ್ಲಿ. ಸುಮಾರು ಏಳನೇ ಶತಮಾನದಿಂದ ಹಿಡಿದು ಹದಿನಾಲ್ಕನೇ ಶತಮಾನದವರೆಗೆ ಕರಾವಳಿಯನ್ನು ಆಳಿದ ‘ಆಳುಪ’ ರಾಜವಂಶದ ಆಡಳಿತದಲ್ಲಿ ಈ ಸಮುದಾಯದ ಯೋಧರು ಮತ್ತು ಮುಖಂಡರು ಬೆನ್ನೆಲುಬಾಗಿ ನಿಂತಿದ್ದರು. ಆಳುಪರ ಸೈನ್ಯದಲ್ಲಿ ಪ್ರಮುಖ ದಂಡನಾಯಕರಾಗಿ, ಮಂತ್ರಿಗಳಾಗಿ ಮತ್ತು ಪ್ರಾದೇಶಿಕ ಆಡಳಿತಗಾರರಾಗಿ ಇವರು ಕಾರ್ಯನಿರ್ವಹಿಸುತ್ತಿದ್ದರು.
ಆನಂತರ ದಕ್ಷಿಣ ಭಾರತದಲ್ಲಿ ಪ್ರಬಲವಾದ ವಿಜಯನಗರ ಸಾಮ್ರಾಜ್ಯ ಸ್ಥಾಪನೆಯಾದಾಗ, ತುಳುನಾಡನ್ನು ಮಂಗಳೂರು ಮತ್ತು ಬಾರ್ಕೂರು ಎಂಬ ಎರಡು ಪ್ರಮುಖ ಪ್ರಾಂತ್ಯಗಳನ್ನಾಗಿ ವಿಂಗಡಿಸಲಾಯಿತು. ಈ ಸಮಯದಲ್ಲಿ ವಿಜಯನಗರದ ಅರಸರು ಕರಾವಳಿಯ ಆಡಳಿತವನ್ನು ಇದೇ ಸಮುದಾಯದ ನಾಯಕರಿಗೆ ವಹಿಸಿದರು. ಇವರನ್ನೇ ನಾವು ಪಾಳೇಗಾರರು ಅಥವಾ ಜಮೀನ್ದಾರರು ಎಂದು ಕರೆಯುತ್ತೇವೆ.
ಅಧಿಕಾರ ಮತ್ತು ಜವಾಬ್ದಾರಿಗಳಿಗೆ ಅನುಗುಣವಾಗಿ ಇವರು ಶೆಟ್ಟಿ, ರೈ, ಆಳ್ವ, ಪೂಂಜಾ, ಬಲ್ಲಾಳ, ಚೌಟ, ಅಜಿಲ ಹೀಗ್ ಅನೇಕ ಬಿರುದುಗಳನ್ನು ಪಡೆದುಕೊಂಡರು. ಇಡೀ ಕರಾವಳಿಯ ರಾಜಕೀಯ ಮತ್ತು ಆರ್ಥಿಕ ನಿಯಂತ್ರಣ ಇವರ ಕೈಯಲ್ಲಿತ್ತು.
ವೀರರಾಣಿ ಅಬ್ಬಕ್ಕನ ಪರಾಕ್ರಮ ಮತ್ತು ಗುತ್ತಿನ ಮನೆಗಳ ಭವ್ಯತೆ
ಇದೇ ಪಾಳೇಗಾರರ ಇತಿಹಾಸದಲ್ಲಿ ಬರುವ ಅತ್ಯಂತ ಹೆಮ್ಮೆಯ ಹೆಸರೆಂದರೆ ವೀರರಾಣಿ ಅಬ್ಬಕ್ಕ. ಹದಿನಾರನೇ ಶತಮಾನದಲ್ಲಿ ಉಳ್ಳಾಲವನ್ನು ಆಳಿದ ಚೌಟ ಮನೆತನದ ಈ ಬಂಟ ರಾಣಿ ಅಬ್ಬಕ್ಕ, ಕರಾವಳಿಯ ಸಾಂಬಾರ ಪದಾರ್ಥಗಳ ಮೇಲೆ ಕಣ್ಣಿಟ್ಟಿದ್ದ ಪೋರ್ಚುಗೀಸರ ವಿರುದ್ಧ ಸತತವಾಗಿ ಹೋರಾಡಿ ಅವರನ್ನು ಹಿಮ್ಮೆಟ್ಟಿಸಿದಳು. ಭಾರತದ ಸ್ವಾತಂತ್ರ್ಯ ಸಂಗ್ರಾಮದ ಇತಿಹಾಸದಲ್ಲಿಯೇ ವಿದೇಶಿಯರ ವಿರುದ್ಧ ಹೋರಾಡಿದ ಮೊದಲ ಮಹಿಳೆ ಎಂಬ ಹೆಗ್ಗಳಿಕೆ ಈ ಸಮುದಾಯದ ವೀರ–ರಾಣಿಗೆ ಸಲ್ಲುತ್ತದೆ.
ಇದೇ ಕಾಲಘಟ್ಟದಲ್ಲಿ ತುಳುನಾಡಿನಾದ್ಯಂತ ‘ಗುತ್ತಿನ ಮನೆಗಳು’ ಅಥವಾ ‘ಬೀಡುಗಳು’ ತಲೆಎತ್ತಿದವು. ಇವು ಕೇವಲ ಶ್ರೀಮಂತರ ವಾಸದ ಮನೆಗಳಾಗಿರಲಿಲ್ಲ, ಬದಲಾಗಿ ಇಡೀ ಗ್ರಾಮದ ಆಡಳಿತ, ನ್ಯಾಯ ತೀರ್ಮಾನ ಮತ್ತು ರಕ್ಷಣೆಯ ಕೇಂದ್ರಗಳಾಗಿದ್ದವು. ಊರಿನ ಯಾವುದೇ ಜಗಳ, ಆಸ್ತಿ ವಿವಾದ ಅಥವಾ ಸಮಸ್ಯೆಗಳಿದ್ದರೂ ಅದನ್ನು ಗುತ್ತಿನ ಮನೆಯ ಯಜಮಾನನು ಚಾವಡಿಯಲ್ಲಿ ಕುಳಿತು ಬಗೆಹರಿಸುತ್ತಿದ್ದನು. ಆತನ ಮಾತೇ ಊರಿಗೆ ಶಾಸನವಾಗಿತ್ತು.
ಜೈನ ಧರ್ಮದ ಪ್ರಭಾವ ಮತ್ತು ಧಾರ್ಮಿಕ ಸಾಮರಸ್ಯ
ಮಧ್ಯಕಾಲೀನ ಇತಿಹಾಸದಲ್ಲಿ ಗಮನಿಸಬೇಕಾದ ಮತ್ತೊಂದು ಪ್ರಮುಖ ಅಂಶವೆಂದರೆ ಶೆಟ್ಟಿ ಮತ್ತು ಬಂಟ ಸಮುದಾಯದ ಮೇಲೆ ಜೈನ ಧರ್ಮ ಬೀರಿದ ಪ್ರಭಾವ. ಹೊಯ್ಸಳರು ಮತ್ತು ವಿಜಯನಗರದ ಕಾಲದಲ್ಲಿ ಜೈನ ಧರ್ಮವು ಕರಾವಳಿಯಲ್ಲಿ ವ್ಯಾಪಕವಾಗಿ ಹರಡಿತು. ಅಹಿಂಸೆ ಮತ್ತು ಶಾಂತಿಯ ತತ್ವಗಳಿಂದ ಆಕರ್ಷಿತರಾದ ಅನೇಕ ಬಂಟ ಮತ್ತು ಶೆಟ್ಟಿ ಮನೆತನಗಳು ಜೈನ ಧರ್ಮವನ್ನು ಸ್ವೀಕರಿಸಿದರು. ಹಾಗಾಗಿ ಇಂದಿಗೂ ಈ ಸಮುದಾಯದಲ್ಲಿ ಹಿಂದೂ ಮತ್ತು ಜೈನ ಎಂಬ ಎರಡು ಪ್ರಮುಖ ಕವಲುಗಳನ್ನು ನಾವು ನೋಡಬಹುದು. ಧರ್ಮಗಳು ಬೇರೆಯಾದರೂ ಇವರ ನಡುವಿನ ಸಾಂಸ್ಕೃತಿಕ ಹಾಗೂ ವೈವಾಹಿಕ ಸಂಬಂಧಗಳು ಎಂದಿಗೂ ಹಾಳಾಗಲಿಲ್ಲ.
ಮೂಡುಬಿದಿರೆಯ ಸಾವಿರ ಕಂಬದ ಬಸದಿ, ಕಾರ್ಕಳ ಮತ್ತು ವೇಣೂರಿನ ಭವ್ಯವಾದ ಗೊಮ್ಮಟೇಶ್ವರ ಮೂರ್ತಿಗಳ ನಿರ್ಮಾಣ ಮತ್ತು ನಿರ್ವಹಣೆಯಲ್ಲಿ ಈ ಸಮುದಾಯದ ಪಾಳೇಗಾರರ ಕೊಡುಗೆ ಅಪಾರವಾಗಿದೆ.
ಅಳಿಯ ಸಂತಾನ ಪದ್ಧತಿ ಮತ್ತು ವಿಶಿಷ್ಟ ಸಾಂಸ್ಕೃತಿಕ ಪರಂಪರೆ
ಶೆಟ್ಟಿ ಸಮುದಾಯದ ಇತಿಹಾಸದಲ್ಲಿನ ಒಂದು ವಿಶಿಷ್ಟವಾದ ಪದ್ಧತಿ ಎಂದರೆ ಅದು ‘ಅಳಿಯ ಸಂತಾನ’ ಪದ್ಧತಿ. ಭೂತಾಲ ಪಾಂಡ್ಯನೆಂಬ ಪ್ರಾಚೀನ ರಾಜನಿಂದ ಆರಂಭವಾಯಿತು ಎಂದು ಹೇಳಲಾಗುವ ಈ ಪದ್ಧತಿಯು ಒಂದು ವಿಶಿಷ್ಟವಾದ ಮಾತೃಪ್ರಧಾನ ವ್ಯವಸ್ಥೆಯಾಗಿದೆ. ಪ್ರಪಂಚದ ಬಹುತೇಕ ಸಮಾಜಗಳಲ್ಲಿ ಆಸ್ತಿ, ಅಧಿಕಾರ ಮತ್ತು ವಂಶದ ಹೆಸರು ತಂದೆಯಿಂದ ಮಗನಿಗೆ ವರ್ಗಾವಣೆಯಾದರೆ, ಈ ಸಮುದಾಯದಲ್ಲಿ ಆಸ್ತಿ ಮತ್ತು ಅಧಿಕಾರವು ತಾಯಿಯ ಕಡೆಯಿಂದ ಮಗನಿಗೆ ಅಥವಾ ಸೋದರಳಿಯನಿಗೆ ವರ್ಗಾವಣೆಯಾಗುತ್ತಿತ್ತು. ಈ ವ್ಯವಸ್ಥೆಯು ಸಮಾಜದಲ್ಲಿ ಮಹಿಳೆಯರಿಗೆ ಅತ್ಯುನ್ನತ ಗೌರವ, ಆರ್ಥಿಕ ಸ್ವಾತಂತ್ರ್ಯ ಮತ್ತು ಭದ್ರತೆಯನ್ನು ಒದಗಿಸಿತ್ತು.
ಇನ್ನು ಇವರ ಸಾಂಸ್ಕೃತಿಕ ಬದುಕಿನ ಬಗ್ಗೆ ಹೇಳುವುದಾದರೆ, ದೈವಾರಾಧನೆ ಮತ್ತು ಕಂಬಳ ಇವರ ಉಸಿರಾಗಿತ್ತು. ಪಂಜುರ್ಲಿ, ಕಲ್ಲುರ್ಟಿ, ಕೊರಗಜ್ಜ ಮುಂತಾದ ದೈವಗಳನ್ನು ಊರಿನ ನ್ಯಾಯಾಧೀಶರಂತೆ ಪೂಜಿಸುತ್ತಿದ್ದರು. ತಪ್ಪು ಮಾಡಿದರೆ ದೈವ ಶಿಕ್ಷಿಸುತ್ತದೆ ಎಂಬ ಭಯವೇ ಸಮಾಜದಲ್ಲಿ ಶಿಸ್ತು ಮತ್ತು ಪ್ರಾಮಾಣಿಕತೆಯನ್ನು ಕಾಪಾಡಿತ್ತು. ಕೃಷಿ ಮತ್ತು ಭೂಮಿಯ ಮೇಲಿನ ಒಲವಿನ ಸಂಕೇತವಾಗಿ ಕಂಬಳವು ಒಂದು ಕ್ರೀಡೆಯಾಗಿ ಮತ್ತು ಗುತ್ತಿನ ಮನೆಗಳ ಪ್ರತಿಷ್ಠೆಯಾಗಿ ಬೆಳೆಯಿತು.
ಬ್ರಿಟಿಷರ ಆಗಮನ, ಆಡಳಿತದ ಬದಲಾವಣೆ ಮತ್ತು ಶೈಕ್ಷಣಿಕ ಕ್ರಾಂತಿ
ಹದಿನೆಂಟನೇ ಶತಮಾನದ ಅಂತ್ಯದಲ್ಲಿ, ಅಂದರೆ 1799ರಲ್ಲಿ ಟಿಪ್ಪು ಸುಲ್ತಾನನ ಪತನದ ನಂತರ ಕರಾವಳಿ ಭಾಗವು ಸಂಪೂರ್ಣವಾಗಿ ಬ್ರಿಟಿಷರ ವಶವಾಯಿತು. ಬ್ರಿಟಿಷರ ಆಗಮನವು ಶೆಟ್ಟಿ ಸಮುದಾಯದ ಬದುಕಿನಲ್ಲಿ ದೊಡ್ಡ ತಿರುವನ್ನು ನೀಡಿತು. ಬ್ರಿಟಿಷರು ಪರಿಚಯಿಸಿದ ‘ರೈತವಾರಿ ಪದ್ಧತಿ’ಯಿಂದಾಗಿ ಮಧ್ಯವರ್ತಿಗಳಾಗಿದ್ದ ಜಮೀನ್ದಾರರು ಮತ್ತು ಪಾಳೇಗಾರರ ಸಾಂಪ್ರದಾಯಿಕ ಅಧಿಕಾರಗಳು ಕಡಿತಗೊಂಡವು.
ಕತ್ತಿ ಮತ್ತು ಬಂದೂಕು ಹಿಡಿದು ಯುದ್ಧ ಮಾಡುವ ಅವಕಾಶಗಳು ಇಲ್ಲವಾದಾಗ, ಈ ಸಮುದಾಯವು ಸಂಪೂರ್ಣವಾಗಿ ಕೃಷಿ ಮತ್ತು ಭೂಮಿಯ ನಿರ್ವಹಣೆಯತ್ತ ಮುಖ ಮಾಡಿತು. ಇದೇ ಸಮಯದಲ್ಲಿ ಮಂಗಳೂರಿಗೆ ಆಗಮಿಸಿದ ಬಾಸೆಲ್ ಮಿಷನ್ ನಂತಹ ಕ್ರಿಶ್ಚಿಯನ್ ಮಿಷನರಿಗಳು ಆಧುನಿಕ ಇಂಗ್ಲಿಷ್ ಶಿಕ್ಷಣವನ್ನು ಮತ್ತು ಹೆಂಚಿನ ಕಾರ್ಖಾನೆಗಳನ್ನು ಪರಿಚಯಿಸಿದರು. ಜಗತ್ತಿನ ವೇಗಕ್ಕೆ ತಕ್ಕಂತೆ ಬದಲಾಗಬೇಕು ಎಂಬುದನ್ನು ಅರಿತ ಶೆಟ್ಟಿ ಕುಟುಂಬಗಳು ತಮ್ಮ ಮಕ್ಕಳಿಗೆ ಆಧುನಿಕ ಶಿಕ್ಷಣವನ್ನು ಕೊಡಿಸಲು ಪ್ರಾರಂಭಿಸಿದರು. ಈ ಶೈಕ್ಷಣಿಕ ಕ್ರಾಂತಿಯೇ ಮುಂದಿನ ದಿನಗಳಲ್ಲಿ ಈ ಸಮುದಾಯದವರು ಕಾನೂನು, ವೈದ್ಯಕೀಯ, ಶಿಕ್ಷಣ ಮತ್ತು ಆಡಳಿತ ಕ್ಷೇತ್ರಗಳಲ್ಲಿ ಪ್ರಬಲವಾಗಿ ಬೆಳೆಯಲು ಭದ್ರವಾದ ಬುನಾದಿಯನ್ನು ಹಾಕಿಕೊಟ್ಟಿತು.
ಸ್ವಾತಂತ್ರ್ಯಾನಂತರದ ಬಹುದೊಡ್ಡ ಆಘಾತ ಮತ್ತು ಭೂ ಸುಧಾರಣಾ ಕಾಯ್ದೆ
ಭಾರತಕ್ಕೆ ಸ್ವಾತಂತ್ರ್ಯ ಬಂದ ನಂತರ ಈ ಸಮುದಾಯವು ನೆಮ್ಮದಿಯ ಜೀವನ ನಡೆಸುತ್ತಿತ್ತು. ಆದರೆ 1970ರ ದಶಕದಲ್ಲಿ ಕರ್ನಾಟಕದ ಅಂದಿನ ಮುಖ್ಯಮಂತ್ರಿ ದೇವರಾಜ ಅರಸು ಅವರು ಜಾರಿಗೆ ತಂದ ‘ಉಳುವವನೇ ಭೂಮಿಯ ಒಡೆಯ’ ಎಂಬ ಭೂ ಸುಧಾರಣಾ ಕಾಯ್ದೆಯು ನಾಡಿನ ಚಿತ್ರಣವನ್ನೇ ಬದಲಾಯಿಸಿತು. ನೂರಾರು ಎಕರೆ ಭೂಮಿಯನ್ನು ಹೊಂದಿದ್ದ ಜಮೀನ್ದಾರರು ಮತ್ತು ಗುತ್ತಿನ ಮನೆತನದವರು ರಾತ್ರೋರಾತ್ರಿ ತಮ್ಮ ಸರ್ವಸ್ವವನ್ನೂ ಕಳೆದುಕೊಂಡರು. ಯಾರು ಗೇಣಿದಾರರಾಗಿ ಭೂಮಿಯನ್ನು ಉಳುತ್ತಿದ್ದರೋ ಅವರಿಗೇ ಆ ಜಮೀನಿನ ಸಂಪೂರ್ಣ ಹಕ್ಕು ಸಿಕ್ಕಿತು.
ಒಂದುಕಡೆ ಶತಮಾನಗಳಿಂದ ಕೇವಲ ಕೃಷಿ ಭೂಮಿಯನ್ನೇ ನಂಬಿ ಬದುಕಿದ್ದ ಸಾವಿರಾರು ಶೆಟ್ಟಿ ಕುಟುಂಬಗಳು ತೀವ್ರವಾದ ಆರ್ಥಿಕ ಮುಗ್ಗಟ್ಟಿಗೆ ಸಿಲುಕಿದರೆ ಅನೇಕ ಶೆಟ್ಟಿ ಕುಟುಂಬಗಳಿಗೆ ಈ ಕಾಯ್ದೆ ವರದಾನವಾಯಿತು. ಈ ಕಾಯ್ದೆ ಒಂದು ರೀತಿಯಲ್ಲಿ ಸಾಮಾಜಿಕ ಮತ್ತು ಆರ್ಥಿಕ ಸಮಾನತೆಯ ದೃಷ್ಟಿಯಿಂದ ಉತ್ತಮವಾದರೂ, ಏಕಾಏಕಿ ಎಲ್ಲವನ್ನೂ ಕಳೆದುಕೊಂಡ ಜಮೀನ್ದಾರರ ಕುಟುಂಬಗಳ ಪಾಲಿಗೆ ಇದು ಅರಗಿಸಿಕೊಳ್ಳಲಾಗದ ದೊಡ್ಡ ಆಘಾತವಾಗಿತ್ತು.
ಮುಂಬೈ ವಲಸೆ, ಕಠಿಣ ಹೋರಾಟ ಮತ್ತು ಹೋಟೆಲ್ ಸಾಮ್ರಾಜ್ಯದ ಉದಯ
ಆರ್ಥಿಕ ಸಂಕಷ್ಟ, ಕುಟುಂಬಗಳ ನಿರ್ವಹಣೆಯ ಹೊರೆ ಮತ್ತು ಬೇರೆ ಉದ್ಯೋಗಾವಕಾಶಗಳ ಕೊರತೆಯಿಂದಾಗಿ ಈ ಸಮುದಾಯದ ಅನೇಕ ಯುವಕರು ರೈಲು ಹತ್ತಿ ಮುಂಬೈ ಮಹಾನಗರವನ್ನು ತಲುಪಿದರು. ಜಮೀನ್ದಾರರ ಮನೆತನದಲ್ಲಿ ಹುಟ್ಟಿ ಬೆಳೆದ ಈ ಯುವಕರು ಮುಂಬೈನ ಸಣ್ಣ ಸಣ್ಣ ಕ್ಯಾಂಟೀನ್ ಗಳಲ್ಲಿ ಕೆಲಸಗಳಿಗೆ ಸೇರಿಕೊಂಡರು. ಆದರೆ ಇವರ ರಕ್ತದಲ್ಲೇ ಇದ್ದ ಕಠಿಣ ಪರಿಶ್ರಮ, ಪ್ರಾಮಾಣಿಕತೆ ಮತ್ತು ವ್ಯಾಪಾರಿ ಬುದ್ಧಿ ಇವರನ್ನು ಹೆಚ್ಚು ಕಾಲ ಅಲ್ಲಿಯೇ ಉಳಿಯಲು ಬಿಡಲಿಲ್ಲ.
ತಾವು ದುಡಿದ ಹಣದಲ್ಲಿಯೇ ಸ್ವಲ್ಪ ಸ್ವಲ್ಪ ಉಳಿತಾಯ ಮಾಡಿ, ತಾವೇ ಸ್ವತಃ ಸಣ್ಣಪುಟ್ಟ ಹೋಟೆಲ್‌ಗಳನ್ನು ಆರಂಭಿಸಿದರು. ಮುಂಬೈ ಮತ್ತು ಪುಣೆಯ ಗಿರಣಿ ಕಾರ್ಮಿಕರಿಗೆ ಮತ್ತು ಸಾಮಾನ್ಯ ಜನರಿಗೆ ಅತ್ಯಂತ ಕಡಿಮೆ ದರದಲ್ಲಿ ಶುದ್ಧವಾದ, ರುಚಿಯಾದ ಹಾಗೂ ಆರೋಗ್ಯಕರವಾದ ದಕ್ಷಿಣ ಭಾರತದ ಆಹಾರವನ್ನು ನೀಡಲು ಪ್ರಾರಂಭಿಸಿದರು. ಇಡ್ಲಿ, ದೋಸೆ, ಸಾಂಬಾರ್ ಗಳ ರುಚಿಗೆ ಮುಂಬೈ ಜನರು ಫಿದಾ ಆದರು. ದಿನಕಳೆದಂತೆ ಈ ಸಣ್ಣ ಹೋಟೆಲ್‌‌ಗಳು ಬೃಹತ್ ಉದ್ಯಮಗಳಾಗಿ ಬೆಳೆದವು. ಇಂದು ಮುಂಬೈ, ಪುಣೆ ಮಾತ್ರವಲ್ಲದೆ ದುಬೈ, ಅಮೆರಿಕ ಮತ್ತು ಯುರೋಪ್ ನ ಮೂಲೆ ಮೂಲೆಗಳಲ್ಲಿ ಕರಾವಳಿಯ ಶೆಟ್ಟಿ ಸಮುದಾಯದವರು ಹೋಟೆಲ್ ಉದ್ಯಮವನ್ನು ಆಳುತ್ತಿದ್ದಾರೆ ಎನ್ನುವುದು ಇವರ ಛಲಕ್ಕೆ ಸಾಕ್ಷಿಯಾಗಿದೆ.
ಆಧುನಿಕ ಯುಗದ ಸಾಧನೆಗಳು ಮತ್ತು ಪ್ರಸಿದ್ಧ ವ್ಯಕ್ತಿಗಳು
ಇಂದು ಶೆಟ್ಟಿ ಸಮುದಾಯವು ಕೇವಲ ಕೃಷಿ ಅಥವಾ ಹೋಟೆಲ್ ಉದ್ಯಮಕ್ಕೆ ಮಾತ್ರ ಸೀಮಿತವಾಗಿಲ್ಲ. ಜಗತ್ತಿನ ಪ್ರತಿಯೊಂದು ಪ್ರಮುಖ ಕ್ಷೇತ್ರದಲ್ಲೂ ತಮ್ಮ ಹೆಜ್ಜೆಗುರುತು ಮೂಡಿಸಿದ್ದಾರೆ. ಬ್ಯಾಂಕಿಂಗ್ ಕ್ಷೇತ್ರವನ್ನು ತೆಗೆದುಕೊಂಡರೆ, ವಿಜಯಾ ಬ್ಯಾಂಕ್‌ನ ಸ್ಥಾಪಕರಾದ ಅತ್ತಾವರ ಬಾಲಕೃಷ್ಣ ಶೆಟ್ಟಿ ಮತ್ತು ಆ ಬ್ಯಾಂಕ್ ಅನ್ನು ದೇಶದಾದ್ಯಂತ ಬೆಳೆಸಿದ ಮುಲ್ಕಿ ಸುಂದರರಾಮ್ ಶೆಟ್ಟಿ ಅವರ ಕೊಡುಗೆ ಐತಿಹಾಸಿಕವಾದದ್ದು. ವೈದ್ಯಕೀಯ ಕ್ಷೇತ್ರದಲ್ಲಿಯೂ ಸಹ ಈ ಸಮುದಾಯದ ಅನೇಕರು ಸೇವೆ ಸಲ್ಲಿಸುತ್ತಿದ್ದಾರೆ.
ಇನ್ನು ಮನರಂಜನೆ ಮತ್ತು ಸಿನಿಮಾ ರಂಗದಲ್ಲಿ ಇವರ ಪ್ರಾಬಲ್ಯದ ಬಗ್ಗೆ ಇನ್ನೊಂದು ಮಾತಿಲ್ಲ. ಬಾಲಿವುಡ್‌ನ ಐಶ್ವರ್ಯಾ ರೈ, ಶಿಲ್ಪಾ ಶೆಟ್ಟಿ, ಸುನಿಲ್ ಶೆಟ್ಟಿ, ರೋಹಿತ್ ಶೆಟ್ಟಿ, ದಕ್ಷಿಣ ಭಾರತದ ಚಿತ್ರರಂಗದ ಸ್ಟಾರ್‌ಗಳಾದ ಅನುಷ್ಕಾ ಶೆಟ್ಟಿ, ರಕ್ಷಿತ್ ಶೆಟ್ಟಿ, ರಿಷಬ್ ಶೆಟ್ಟಿ, ರಾಜ್ ಬಿ ಶೆಟ್ಟಿ ಸೇರಿದಂತೆ ಅನೇಕರು ಕರಾವಳಿಯ ಪ್ರತಿಭೆಯನ್ನು ಜಗತ್ತಿಗೆ ಪರಿಚಯಿಸಿದ್ದಾರೆ. ಐಟಿ ಕ್ಷೇತ್ರ, ರಿಯಲ್ ಎಸ್ಟೇಟ್, ಮತ್ತು ಗಲ್ಫ್ ರಾಷ್ಟ್ರಗಳ ವಾಣಿಜ್ಯ ರಂಗದಲ್ಲೂ ಈ ಸಮುದಾಯದವರ ಸಾಧನೆ ಅಪಾರವಾಗಿದೆ. ಇವರು ಮುಟ್ಟದ ಕ್ಷೇತ್ರವಿಲ್ಲ, ಮಾಡದ ಸಾಧನೆಯಿಲ್ಲ ಎನ್ನುವ ಮಟ್ಟಿಗೆ ಆಧುನಿಕ ಜಗತ್ತಿನಲ್ಲಿ ಶೆಟ್ಟಿ ಸಮುದಾಯ ಬೆಳೆದು ನಿಂತಿದೆ.
ಇಂದಿನ ಸವಾಲುಗಳು, ಸಾಂಸ್ಕೃತಿಕ ಅಸ್ಮಿತೆ ಮತ್ತು ಭವಿಷ್ಯ
ಈ ಸಮುದಾಯದವರ ಒಂದು ಅತ್ಯುತ್ತಮ ಗುಣವೆಂದರೆ ತಮ್ಮ ಊರಿನ ಮೇಲಿನ ಪ್ರೀತಿ. ಜಗತ್ತಿನ ಯಾವುದೇ ಮೂಲೆಯಲ್ಲಿ ಎಷ್ಟೇ ದೊಡ್ಡ ಉದ್ಯಮಿಯಾಗಿರಲಿ ಅಥವಾ ಐಟಿ ಉದ್ಯೋಗಿಯಾಗಿರಲಿ, ತಮ್ಮ ಊರಿನ ದೈವದ ನೇಮ, ಕಂಬಳ ಅಥವಾ ಊರಿನ ಜಾತ್ರೆ ಬಂತೆಂದರೆ ಎಲ್ಲವನ್ನೂ ಬಿಟ್ಟು ಊರಿಗೆ ಓಡೋಡಿ ಬರುತ್ತಾರೆ. ತಮ್ಮ ಮೂಲ ಬೇರುಗಳನ್ನು, ಮಣ್ಣಿನ ಸಂಸ್ಕೃತಿಯನ್ನು ಅವರು ಇಂದಿಗೂ ಉಸಿರಾಗಿಸಿಕೊಂಡಿದ್ದಾರೆ.
ಈ ಮಾಹಿತಿ ನಿಮಗೆ ಉಪಯುಕ್ತವೆನಿಸಿದರೆ, ದಯವಿಟ್ಟು ನಿಮ್ಮ ಸ್ನೇಹಿತರು ಮತ್ತು ಇತರರೊಂದಿಗೆ ಹಂಚಿಕೊಳ್ಳಿ. ಇದೇ ರೀತಿ, ಇನ್ನಿತರ ವಿಷಯಗಳನ್ನೂ ಸಹ ನೀವು ನಮ್ಮ ಬ್ಲಾಗ್ ನಲ್ಲಿ ಓದಬಹುದು.
ಈ ಬ್ಲಾಗ್‌ನಲ್ಲಿರುವ ಎಲ್ಲಾ ವಿಷಯವು ಹಕ್ಕುಸ್ವಾಮ್ಯವನ್ನು ಹೊಂದಿದೆ ಮತ್ತು ಲೇಖಕರ ಅನುಮತಿಯಿಲ್ಲದೆ ನಕಲು ಮಾಡುವುದನ್ನು ಅನುಮತಿಸಲಾಗುವುದಿಲ್ಲ.
All content on this blog is copyrighted, and copying is not allowed without permission from the author.
